Nazarbaev: Qazaqstan júrgizgen reformalar ózge memleketterge úlgi boldy
ASTANA. QazAqparat - QR Prezıdenti Nursultan Nazarbaev «MIR 24» arnasyna bergen suhbatynda Ortalyq Azııa elderiniń arasynda Qazaqstannyń ozyq tustaryn atap ótti, dep habarlady «QazAqparat» HAA.
Prezıdenttiń aıtýynsha, táýelsizdiktiń bastaýynda Qazaqstan arnaıy baǵdarlama qabyldady - jedel jekeshelendirý, Qazaqstanǵa transulttyq kompanııalardy jáne úlken kólemde ınvestıtsııalar tartý, sotsıalıstik ekonomıkany naryqtyq ekonomıkaǵa beıimdeý, shaǵyn jáne orta bıznesti damytý dereý qolǵa alyndy. Osynyń barlyǵy ekonomıkany qatty kóterýge múmkindik berdi.
«Qazaqstan ekonomıkasy 25 jylda 23 ese ósken. Jan basyna shaqqandaǵy JІÓ kólemi boıynsha, barlyq kórshi memleketterdi basyp ozdyq, qazir onyń deńgeıi Shyǵys Eýropa elderiniń JІÓ kólemimen birdeı. Biraq qazir baǵalardyń tómendeýi, devalvatsııanyń oryn alýy, jaǵdaıdy qıyndatyp jiberdi, degenmen óndiristiń jalpy kólemi sol qalpynda qalyp otyr. Qazaqstanda kedeıshilik 12 ese - 40 protsentten 5 protsentke deıin tómendedi. Jumyssyzdyq ta kúrt tómendedi, osynyń barlyǵy qoǵamda turaqty jaǵdaı qalyptastyryp otyr», - dep atap ótti Memleket basshysy.
Prezıdenttiń habarlaǵanyndaı, Qazaqstan zeınetaqy men jalaqy kólemin eshqashan kemitken emes.
«Tipti daǵdarys kezinde de ondaıǵa barǵan joqpyz. Buǵan arnaıy Ulttyq qor kóp kómegin berdi. Myqty ekonomıka bar kezde qorǵanys, mádenıet, bilim berý, densaýlyq saqtaý salalary da nyǵaıa túsedi. Osy salalardyń barlyǵynda da kóp jumys atqaryldy. Menińshe, keıbir reformalar boıynsha biz barlyǵyn ozyp kettik dep sanaımyn, olar bizdiń kórshi memleketter úshin úlgi boldy», - dedi Nursultan Nazarbaev reseılik telearnaǵa bergen suhbatynda.
