Nazarbaev: Qazaqstan men Japonııa yntymaqtastyǵy barlyq baǵytta jandanyp kele jatyr
TOKIO. QazAqparat - Nursultan Nazarbaev Japonııa Parlamentiniń Qazaqstan Respýblıkasymen dostyq lıgasynyń tóraǵasy Takeo Kavamýramen jáne lıga múshelerimen kezdesti, dep habarlaıdy Aqordanyń baspasóz qyzmeti.
Áńgime barysynda Memleket basshysy Japonııa Parlamentiniń Qazaqstan Respýblıkasymen dostyq lıgasy eki el halqy arasyndaǵy strategııalyq seriktestikti nyǵaıtýǵa baǵa jetpes úles qosqanyn atap ótti.
Qazaqstan Prezıdenti elimizge kórsetilgen qoldaý men yntymaqtastyqty damytý jolynda jumsalǵan kúsh-jiger úshin alǵys aıtty.
- Sizder bizge EKSPO-2017 kórmesin ótkizý quqyǵyna ıe bolý jolynda jáne ıadrolyq qarýsyzdaný jumysyn júrgizý barysynda zor qoldaý kórsettińizder, - dedi Nursultan Nazarbaev.
Elbasy barlyq baǵyt boıynsha Qazaqstan men Japonııa yntymaqtastyǵynyń jandanyp kele jatqanyna nazar aýdardy.
- Biz táýelsizdiktiń 25 jyldyǵyn atap ótýdemiz. Bul onsha uzaq merzim emes. Alaıda, osy ýaqyt ishinde biz kóp jetistikke jettik dep sanaımyn. Japonııamen qarym-qatynasty odan ári damytý biz úshin mańyzdy. Biz - Azııa elderimiz, bizdiń tarıhymyz ortaq, - dedi Qazaqstan Prezıdenti.
T.Kavamýra kezdesýge ýaqyt bólgeni úshin Nursultan Nazarbaevqa alǵysyn bildirdi.
- Kelesi jyly Japonııa men Qazaqstan arasynda dıplomatııalyq qarym-qatynastyń ornaǵanyna 25 jyl tolady, sondaı-aq EKSPO kórmesi ótedi. Biz bul oqıǵalardy parlamentaralyq tájirıbe almasý isine serpin berý úshin paıdalanýdy kózdep otyrmyz, - dedi Japonııa Parlamentiniń Qazaqstan Respýblıkasymen dostyq lıgasynyń tóraǵasy.
T.Kavamýra sondaı-aq elimizdiń 2017-2018 jyldary BUU-nyń Qaýipsizdik keńesiniń turaqty emes múshesi bolyp saılanýymen quttyqtap, Qazaqstan bul mindetti atqarý barysynda ıadrolyq qarýsyzdaný men taratpaý isine budan da zor úles qosa alatynyn aıtty.
Osy oraıda, Memleket basshysy óziniń «Álem. HHІ ǵasyr» atty manıfesin jarııalaǵanyna jáne BUU Bas Assambleıasy sessııasynda 2045 jylǵa qaraı ıadrolyq qarýdan azat álem qalyptastyrý maqsatyna qol jetkizýge shaqyrǵanyna toqtalyp, osy bastamalarǵa Japonııa tarapynyń da qoldaý kórsetetinine senim bildirdi.
