Nazarbaev: Qazaqstan men Izraıldi tikeleı áýe jolymen baılanystyrý qajet
ASTANA. QazAqparat - Qazaqstan men Izraıldi tikeleı áýe jolymen baılanystyrý qajet. Bul jaıynda búgin Aqordada Izraıl Premer-mınıstri Bınıamın Netanıahýmen keńeıtilgen quramdaǵy kelissózderden keıingi birlesken málimdeme barysynda QR Prezıdenti Nursultan Nazarbaev aıtty, dep habarlaıdy QazAqparat.
«Qazir biz jumys tobyn qurý, kelisimshart, Jol kartasy josparyn qurý týraly ýaǵdalastyq. Mundaı qujattar tolyq daıyn bolǵannan keıin biz Premer-Mınıstr myrzamen birge oǵan qol qoıyp, birlese jumys isteı bastaıtyn bolamyz», - dep atap ótti Elbasy.
Osy rette Qazaqstan Prezıdenti eki eldiń arasyndaǵy saýda-ekonomıkalyq yntymaqtastyqty jaqsartýǵa septigin tıgize alatyn birqatar máselege de keńinen toqtalyp ótti.
«Bıznes ózara jumys isteýi úshin bizge elderimiz arasynda tikeleı áýe baılanysy, vızasyz rejim qajet. Bul máseleni Qazaqstan óz tarabynan sheshýde, al ekonomıkalyq máseleler buǵan múddeli kompanııalarda talqylanatyn bolady», - dedi Memleket basshysy.
Sonymen qatar Elbasy búgin qazaqstandyq-ızraıldik bıznes forýmnyń ótetindigin eskertti.
«Bizdiń isker adamdarymyz túıisý núktelerin tyńǵylyqty talqylaıdy dep oılaımyn. Izraıl Eýrazııalyq ekonomıkalyq odaqpen aradaǵy erkin saýda aýmaǵyna qatysýǵa qyzyǵýshylyq tanytýda. Qazaqstan uıymǵa tóraǵa retinde qoldaıdy. Biz tek qana bul baǵytta emes, sonymen birge medıtsına, adamdarymyzdy oqytý, jańa tehnologııalar, ındýstrııa máselelerinde de yntymaqtasa alatyndyǵymyzdy aıttyq jáne Izraıldiń zor jetistigi bar», - dedi Nazarbaev.
QR Prezıdenti Qazaqstannyń «Nurly jol» baǵdarlamasynyń Uly jibek joly jobasymen túıindesýi Izraıldiń kólik salasyna qyzyǵýshylyǵyn oıatatyndyǵyn atap ótti.
