Nazarbaev halyqaralyq sarapshylarmen Eýrazııanyń ózekti máselelerin talqylaýda
Halyqaralyq deńgeıdegi sharaǵa álemniń 50-den astam sarapshysy, saıası jáne qoǵam qaıratkerleri, 21 eldiń ǵalymdary, sonymen birge jetekshi qazaqstandyq sarapshylar qatysýda.
Aıta keterligi, klýb otyrysy keshe bastalǵan bolatyn. Ol kúni sarapshylar óńirdegi elderdiń ustanymy, ekonomıkalyq damý, ınfraqurylym, resýrstyq sektor problemalary, adam kapıtalyn damytý jáne ózge de ózekti máselelerdi jan-jaqty talqylaǵan-dy. Al búgin halyqaralyq sarapshylar Memleket basshysymen kezdesýde. Erteń jáne odan arǵy kúni klýb otyrysyna qatysýshylar «Eýrazııa toǵysynda: Óńirlik probelmalarǵa negizgi álemdik oıynshylardyń kózqarasy», «Eýrazııa resýrstary: «Altyn ǵasyrdyń» sońy ma?», «Eýrazııa adamdary: turaqsyzdyq kózi me álde baılyq kózi me?» syndy sessııalarda Eýrazııa óńirine qatysty ózekti máselelerdi jan-jaqty talqylamaq.
Astana klýby QR Tuńǵysh Prezıdenti - Elbasy qorynyń jetekshi halyqaralyq ǵylymı ortalyqtar Qytaı qazirgi zamanǵy halyqaralyq qatynastar akademııasy, Germanııa syrtqy saıasat keńesi, Reseı halyqaralyq ister keńesi jáne Halyqaralyq beıbitshilik úshin Karnegı qorymen birlesip qurǵan halyqaralyq pikirtalas alańy sanalady.
Astana klýbynyń birinshi otyrysy 2015 jylǵy qarashada álemniń 15 elinen kelgen 47 sarapshynyń qatysýymen ótken edi. Onyń barysynda Eýrazııa geoekonomıkasynyń negizgi aspektileri, ǵalamdyq jáne óńirlik oıynshylardyń múddeleri, ekonomıkalyq qaýip-qaterler men múmkindikter máseleleri talqylanǵan bolatyn.