Nazarbaev halyqaralyq áýejaıynda Ashyq qosymshasy iske qosyldy
Áýejaıda Ashyq qosymshasy apta basynan beri jumys istep tur. Aldyńǵy eki kúnde júıe test rejıminde iske qosylǵan. Sol aralyqta 1 adamda «qyzyl» tústi, 4 adamda «sary» tústi mártebe anyqtalyp, ǵımarattyń kire berisinen keri qaıtarylǵan.
Ashyq qosymshasynyń búginnen bastap resmı iske qosylýyna baılanysty barlyq kelýshige aldyn ala qosymshany júktep alyp, óz mártebesin tekserý qajet. Al jolaýshylar bılet satyp almaı turyp mártebesin anyqtaý kerek.
Ashyq.kz qosymshasy arqyly kúıdi tekserý úshin QR kod qoljetimdi. «Sary» jáne «qyzyl» tústi mártebesi bar jolaýshylarǵa termınal ǵımaratyna kirýge ruqsat berilmeıdi. Áýejaıǵa kelýshi óz mártebesin aldyn ala mobıldi qosymshany júktep alyp, Ashyq.kz saıtyna kirip úıden shyqpaı turyp bile alady. Jolaýshynyń mártebesi «qyzyl» tústi ekeni áýejaıda anyqtalsa, bılet quny qaıtarylady. Ol úshin áýe kompanııasyna júginý qajet. «Qyzyl» nemese «sary» statýs anyqtalǵan jolaýshylardy áýejaıdyń óz algorıtmi boıynsha sanıtarlyq-epıdemıologııalyq qyzmet ókilderine tapsyramyz. SES jáne polıtsııa qyzmetkerleri bizben birge 24 saǵat boıy jumys istep jatyr», - deıdi áýejaıdyń baspasóz hatshysy Ánýar Shalekenov.
Ashyq qosymshasyn júktegen adam óz statýsyn bilý úshin áýeli tildi tańdaýy kerek. Sodan keıin telefon nómiri boıynsha tirkeledi. Engizilgen nómirge kody bar SMS habarlama keledi. Sol kod arqyly tekserý jolyna ótip, jeke sáıkestendirý nómirin (JSN) engizip, termınalǵa kirgen kezde QR kod beriledi. Osy QR kod arqyly jolaýshy mártebesi anyqtalady.
Al sheteldikter JSN ornyna pasport nómiri arqyly óz mártebesin anyqtaı alady.
«Áýejaıǵa kelýshide Ashyq jobasyn ornatatyn smartfon bolmasa nemese mobıldi qosymshany júktep úlgermese, áýejaıdyń jaýapty qyzmetkeri óziniń mobıldi qosymshasymen kelýshiniń JSN-sn engizý arqyly tirkeýge kómektesedi. Sol úshin qyzmetkerlerge 20 arnaıy planshet bóldik», - deıdi Ánýar Shalekenov.
Ashyq jobasyn smartfonǵa júktep úlgermegen jolaýshylarmen sóılesip kórdik.
«Almatyǵa ushý úshin kelgen bolatynmyn. Ashyq qosymshasyn ornatyp úlgermegen edik. Kire beriste áýejaı qyzmetkerleri JSN nómirim arqyly mártebemdi anyqtap, kedergisiz ótkizdi. Kórip turǵandaryńyzdaı, eshqandaı kezek keptelisine tap bolǵan joqpyn», - deıdi Albına Altynbek esimdi jolaýshy.
Áýejaı ókili Ánýar Shalekenov keshe ǵımarattyń kire berisinde kezek nege qalyptasqanyn túsindirdi.
«Ashyq qosymshasy búginge deıin test rejıminde jumys istegen edi. Sondyqtan tańǵy reıs kezinde adam shoǵyry qalyptasty. Biraq búgin ol túıtkildi joıdyq. Áýejaıdaǵy 4 kire beris te ashyq tur. Jolaýshylar men kelýshiler ǵana emes, áýejaıdyń barlyq qyzmetkerleri ǵımaratqa tek Ashyq qosymshasy arqyly kiredi», - dedi Ánýar Shalekenov.
Eske salsaq, QR Kóliktegi bas sanıtar dárigeriniń keshe shyqqan qaýlysy boıynsha áýejaı men temirjol vokzalyna kirý tártibi ózgerdi.
