Nazarbaev Dosaevqa «Báıterek» holdınginiń strategııasyn aıqyndaýdy tapsyrdy
Kezdesý barysynda Memleket basshysyna holdıngtiń 2016 jylǵy qyzmetiniń qorytyndysy jónindegi esebi jáne odan ári damý jospary usynyldy.
Dosaev óz sózinde aktsıonerlik qoǵamnyń aktıvi 4 trln 100 mlrd teńgeden asyp, taza tabysy 30 mlrd teńgeni qurap otyrǵanyn aıtty.
Sondaı-aq, «Báıterek» ulttyq basqarýshy holdıngi» aktsıonerlik qoǵamy basqarmasynyń tóraǵasy Memleket basshysyn «Qazaqstannyń damý banki» aktsıonerlik qoǵamynyń jumysy jaıly jáne elimizdegi ekonomıkalyq ahýal men Ulttyq banktiń jańa monetarlyq saıasatyn eskere otyryp, holdıngtiń strategııalyq damýyna ózgerister engizýge arnalǵan josparlary jóninde habardar etti.
Qazaqstan Prezıdenti holdıngtiń elimizdiń ekonomıkasy úshin mańyzy zor jobalardy iske asyrý barysyndaǵy rólin atap ótti.
«Holdıngtiń aldyna áýel bastan iri jobalardy nesıeleý jóninde mindet qoıylǵan. Alaıda, ekonomıkalyq daǵdarys jaǵdaıynda «Báıterekke» kóptegen túrli qosymsha tapsyrmalar berildi. Osyǵan baılanysty qazir onyń budan arǵy qyzmetiniń strategııalyq perspektıvalaryn aıqyndaý qajet», - dedi Elbasy.
Nursultan Nazarbaev kezdesý qorytyndysy boıynsha birqatar naqty tapsyrma berdi.