Nazarbaev Danııar Eleýsinovtiń «Alǵa, Qazaqstan!» uranyn resmı bekitý usynysyn qoldady
"Árıne, búgin qýanysh, búgin mereke. Barlyǵymyzdyń toıymyz. Toı ústinde toıǵa baılanysty tilekter aıtylady. Sondyqtan meniń atyma da kóp sózder aıtyldy. Árıne, adam retinde onyń bárin tyńdaý janyńa jaǵady. Degenmen myndaı qyrýar jumysty qandaı bolsa da bir adam eńsere almaıdy. Sondyqtan basymdy ıip, halqyma rızashylyǵymdy bildiremin", - dedi Elbasy.
Memleket basshysy qıyn-qystaý jaǵdaılarda senim artyp, sońyna ilesken halqyna alǵysyn aıtty.
"Bul halqymyzdyń, qazaqtyń taǵy bir uly erligi bolyp sanalady. Osydan esh ýaqytta tanbaıyq. Biz tarıhtan bilemiz, qazaqty esh ýaqytta syrttan kelip jaý alǵan joq. Aldymen ishimizdi iritip, bir-birimizge aıdap salyp, "ból de jaýlap al" degen saıasatty júrgizdi. Qazaqtyń basy birikkende barlyq jaýdy jeńip otyrǵan. Sondyqtan birligimizden tanbaıyq. Bir bolsaq, birge bolsaq, aldymen qazaqtyń birligi, ekinshi kóp etnosty elimizdiń birligi, bizge degen senim bolsa barlyq aıtqanymyz bolady. Erteńnen bastap ekinshi 25 jyldyqqa aıaq basamyz. Ekinshi 25 jyldyq bitip, Qazaqstannyń 50 jyldyǵynda munan da keremet sózder aıtylatyndyǵyna senemin", - dedi Elbasy.
Sonymen qatar Nazarbaev búgingi jıynda Rıo Olımpıadasynyń chempıony Danııar Eleýsinovtiń Qazaqstannyń uranyna qatysty usynys jasaǵanyn aıta kele: "Muny qoldaımyn. Uranymyz - "Alǵa, Qazaqstan!" bolsyn", - dedi.
Aıta keteıik, saltanatty jıyn barysynda sóz sóılegen Danııar Eleýsinov Qazaqstan Prezıdentine: "Álemdegi kóptegen memleketterdiń urandary bar. Jastardy jigerlendirip, azamattardy biriktiretin biraq aýyz sóz. Bizdiń babalarymyz da uran shaqyrylǵanda bir týdyń astynan tabylǵan. Osyǵan baılanysty sportshylardan ózińizge usynys bar. «Qazaqstan, tek qana alǵa!» degen sózińizdi elimizdiń resmı uranyna aınaldyrsaq. Bul barsha patrıottardyń máńgilik urany bolar edi", - degen edi.
