Nazarbaev bılikke muqtaj emes, biz Nazarbaevqa muqtajbyz - Májilis depýtaty B.Tileýhan
ASTANA. 12 qańtar. QazAqparat /Marlan Jıembaı/ - Nazarbaev bılikke muqtaj emes, biz Nazarbaevqa muqtajbyz. Bul pikirdi búgin elordada «Nur Otan» HDP-nyń «Qazaqstan - 2020» jalpyulttyq demokartııalyq kúshter koalıtsııasyn qurý týraly bastamasyna oraı ótkizilgen baspasóz máslıhatynda QR Parlamenti Májilisiniń depýtaty Bekbolat Tileýhan aıtty.
«Nazarbaev bılikke muqtaj emes, biz Nazarbaevqa muqtajbyz. Óıtkeni osy ýaqytqa deıin jetken jetistikterimizge kepil bolyp otyrǵan Elbasynyń tarıhı tulǵasy ekendigine eshkim daý aıta qoımaıtyn shyǵar. Tipti opponenti de, jaqtaýshysy da, basqasy da Nazarbaevtyń tarıhı tulǵasyna, saıası sheberligine kúmán keltirmeıdi. Oǵan dálelder óte-móte kóp. Sondyqtan bizge qazirgi jaǵdaıda, Qazaqstannyń jaǵdaıynda bastalǵan istiń aıaǵyna deıin jetkenine, alańsyz damýǵa, birlikke, yntymaqqa qaraı qadam basýymyzdyń irikilip qalmaýyna kúsh salýymyz kerek. Bul halyqtyń talaby», - dedi halyq qalaýlysy.
Sondaı-aq Májilis depýtaty QR Prezıdenti N.Nazarbaevtyń ókilettigin 2020 jylǵa deıin uzartý jónindegi referendým QR Konstıtýtsııasyna negizdelgenin atap ótti. Onyń aıtýynsha, bul bastama ata zańymyzdyń negizi zańdyq normalaryna qaıshy kelmeıdi. Memlekettiń negizgi bılik kózi halyqtyń sheshimi bolǵandyqtan, bul úlken zańdyq kúshke ıe bolatyndyǵy daýsyz.
«Osyǵan deıin, 20 jylǵa jýyq ýaqyt boıy jasap kele jatqan saıasatymyzdyń barlyǵy birlikke, yntymaqqa negizdelgen. Óıtkeni yntymaq bolmaǵan jerde yrystyń, birlik bolmaǵan jerde tirliktiń bolýy múmkin emes. Sondyqtan osy jalpyulttyq demokartııalyq kúshterdiń barlyǵyn biriktirip, bir jaǵadan bas, bir jeńnen qol shyǵaratyn osy qadamymyz elden, halyqtan qoldaý taýyp jatsa, eń bastysy biz halyqtyń talabyn oryndaı alsaq, menińshe úlken maqsatqa jetkenimiz», - dedi B.Tileýhan.
