«Nazarbaev báribir bizdiń kóshbasshymyz bolyp qala beredi» - respýblıkalyq basylymdarǵa sholý

«Almatyda Qazaqstan Respýblıkasy Prezıdenti janyndaǵy Shetel ınvestorlary keńesiniń kezekti 23-plenarlyq otyrysy bolyp ótti. Plenarlyq májilis jumysyna Memleket basshysy Nursultan Nazarbaev qatysyp, sóz sóıledi», dep jazady «Egemen Qazaqstan» gazeti «Otandyq adam kapıtalyn damytý - mańyzdy mindet»

degen taqyryppen berilgen maalasynda. Basylymnyń atap ótýinshe, otyrystyń kún tártibine qoıylǵan «Qazaqstan ekonomıkasyn bilikti eńbek resýrstarymen tıimdi qamtamasyz etý máseleleri» týraly jıynǵa qatysýshy sheteldik qonaqtar, sondaı-aq qazaqstandyq sala jetekshileri óz oılaryn ortaǵa salǵan. Elbasy Meksıka shyǵanaǵynda oryn alǵan apatty aıta kelip, memleket tarapynan Kaspııde jumys isteıtin kompanııalarǵa qoıylatyn talaptar keleshekte qatańdatylatyndyǵyn málim etken.

Keshe resmı buqaralyq aqparat quraldarynda QR Prezıdenti Nursultan Nazarbaevtyń Tuńǵysh Prezıdent, Elbasy týraly zańnamaǵa ózgerister men tolyqtyrýlar engizý týraly QR Parlamenti qabyldaǵan zańdarǵa qol qoıýdan bas tartý týraly málimdemesi jaryq kórgen bolatyn. Osyǵan oraı el gazeti «Egemen Qazaqstannyń» senbilik nómirinde Pralament depýtattarynyń, qoǵam qaıratkerleriniń, elge tanymal birqatar azamattardyń oı-pikirleri jarııalandy.

«Egemen Qazaqstan» gazetiniń QR Úkimet basshysynyń baspasóz qyzmetine silteme jasap habarlaýynsha, keshe Almaty qalasynda QR Premer-Mınıstri Kárim Másimov IV qazaqstandyq ınvestıtsııalyq sammıt jumysy aýqymynda iri halyqaralyq kompanııalardyń ókilderimen jumys kezdesýlerin ótkizgen. «K.Másimovtiń «ArselorMıttal» kompanııasy dırektorlar keńesiniń tóraǵasy jáne bas atqarýshy dırektory Lakshmı Mıttalmen kezdesýi barysynda Qazaqstandaǵy ken-metallýrgııa kásiporyndary qyzmeti máseleleri talqylandy. Premer-Mınıstrdiń Ernst & Young Global kompanııasynyń bas operatsııalyq dırektory Djon Ferraromen kezdesýi kezinde Qazaqstannyń ınvestıtsııalyq tartymdylyǵyn odan ári jaqsartý jaıy áńgime boldy», dep jazady basylym.

***

«Alash aınasy» gazetiniń senbi kúngi sany tolyǵymen otandyq shoý-bıznes taqyrybyna arnalǵan. Sońǵy ýaqyttarda qazaq estradasy batystyq úlgidegi damýǵa bet alyp, ulttyq dástúrli mýzyka keńinen nasıhattalmaı júrgendigi aqıqat. Jalpy óner salasyndaǵy osy jáne basqa da máselelerdi qamtyǵan basylym bul taqyrypty ónerdiń óz ókilderin sózge tarta otyryp talqyǵa salǵan.

Basylymnyń búgingi oı-kókpar aıdary «Halyqaralyq baıqaýlarǵa úninde ulttyq boıaýy qanyq ánshilerdi ǵana qatystyrý týraly talap qoıý kerek pe?» degen saýal qoıyp otyr. Osyǵan jaýap bergen ánshi, halyqaralyq án baıqaýlarynyń jeńimpazy Altynaı Jorabaeva «Menińshe, mundaı talap qoıý oryndy. Halyqaralyq án baıqaýlarynyń shartyna bul qaıshy kelmeıdi de. Sebebi oǵan qatysýshy álemdik hıtpen qatar, mindetti túrde óz eliniń, óz ultynyń ánin oryndaýy tıis» dese, bul pikirmen kelispegen kompozıtor, senator Tólegen Muhamedjanov «halyqaralyq baıqaýǵa qatysý úshin ánshiniń kásibı deńgeıi joǵary bolýy shart. Qazaqsha aıta ma, oryssha, aǵylshynsha aıta ma - ol mańyzdy emes. Demek, bul jerde elimizden qatysatyn ánshilerdi qazaqy, qazaqy emes dep bólý orynsyz» degen pikirin alǵa tartady.

Sonymen qatar gazette dástúrli ónerpazdardyń basyn qosatyn ortalyq ashý qajettiligi jóninde de oı qozǵalǵan.

Al basylymnyń «Dat» aıdarynda belgili kompozıtor, «Gúlder» ansambliniń jetekshisi Jeńis Seıdollaulymen keń kólemdi suhbat jaryq kórdi. Onda búgingi otandyq shoý-bıznestegi ahýal, prodıýserlik mekteptiń qalyptasý joldary men jalpy rýhanııat máseleleri áńgime ózegine alynǵan.

Osy oıdy ilip áketken tanymal kompozıtor, prodıýser Qydyráli Bolmanov ta «Alash aınasy» oqyrmandarymen óz oıyn bólise kele «qazirgi qaltalylar shoý-bızneske qarajat salǵysy kelmeıdi» degen ýáj aıtady.

Gazette sondaı-aq qazaqstandyq ánshilerdiń zamanaýı óner týrasynda aıtylǵan syn-pikirleri berilgen. Bútindeı bir sanyn shoý-bıznes taqyrybyna arnaǵan «Alash aınasynyń» bul jolǵy sanynan tipti «Dıagnoz» aıdarymen berilgen kópshiligimiz aıtyp júrgen «Juldyz aýrýynyń» naqty medıtsınalyq-psıhologııalyq sıpattamasymen de tanysa alasyzdar.

***

«Qos shatyrly Parlament keshe jedel túrde jalpy otyrysqa jınaldy. Kún tártibinde jalǵyz ǵana másele: «Memleket basshysy Nursultan Nazarbaevtyń Qazaqstan azamattaryna, Parlamentke jáne «Nur Otan» HDP saıası fraktsııasyna joldaǵan úndeýin nazarǵa alý», dep jazady «Aıqyn» gazeti. Elbasy úndeýin senatorlarǵa joǵary palata basshysy Qasym-Jomart Toqaev jarııa etse, Májilis depýtattaryna ony tómengi palata spıkeri Oral Muhamedjanov oqyp bergen. Basylymnyń atap ótýinshe úndeýdi únsiz tyńdaǵan qos palata depýtattary oǵan esh talqylamaı, birden kelisip, «QR Prezıdentiniń úndeýin nazarǵa alý týraly» qaýlyny biraýyzdan qabyldaǵan. Maqalany «Nazarbaev báribir bizdiń kóshbasshymyz bolyp qala beredi» degen taqyryptan oqı alasyzdar.

«Aıqyn» gazetiniń dástúrli «Aq sóıle!» aıdarynyń búgingi qonaǵy - jazýshy Ákim Tarazı. Basylymnyń túrli saýaldaryna tuşymdy jaýap bergen qalamgerdiń suhbaty «Nursultan Ábishulynyń ıadrolyq qarýdan bas tartqanyn erlikke balaımyn» degen taqyryppen berilgen.

***

Búgin elordadaǵy Kongress-Holl saraıynda aqyn Serik Turǵynbekulynyń shyǵarmashylyq keshi ótedi. Osyǵan oraı «Astana aqshamy» kesh ıesimen jolyǵyp, suhbattasqan. Ekeýara áńgime basylymnyń senbilik nómirinde «Astana - qazaq áleminiń aspany ispettes» degen taqyryppen berilgen.