Nazarbaev atyndaǵy Dinder men órkenıetter arasyndaǵy dıalog ortalyǵy qurylady
ASTANA. QazAqparat - Álemdik jáne dástúrli dinder lıderleriniń sezi Hatshylyǵynyń kezekti otyrysynda Mádenıetter men dinderdiń halyqaralyq ortalyǵyn qaıta qurý bastamasy kóterildi, dep habarlaıdy QazAqparat tilshisi.
QR Parlamenti Senatanyń tóraǵasy, Hatshylyq jetekshisi Qasym-Jomart Toqaev erteńgi sezdiń deklaratsııasyna Mádenıetter men dinderdiń halyqaralyq ortalyǵyn Nazarbaev atyndaǵy Dinder men órkenıetter arasyndaǵy dıalog ortalyǵy retinde qaıta qurý máselesin engizýdi usyndy.
«Bıyl Álemdik jáne dástúrli dinder lıderleriniń sezine 15 jyl tolyp otyr. Osy ýaqyttyń ishinde atalǵan forým adamzattyń ózekti ári kúrdeli máseleleri sheshýdiń tıimdi alańyna aınaldy. II sezd kezinde Qazaqstan Prezıdenti Nursultan Nazarbaev Mádenıetter men dinderdiń halyqaralyq ortalyǵyn iske qosqan bolatyn. Atalǵan ortalyqtyń negizgi maqsaty - sezdiń barlyq sheshimderin iske asyrý. Bizdińshe, osy ispetti ınstıtýttardyń rólin kúsheıtetin kez keldi. Sondyqtan Mádenıetter men dinderdiń halyqaralyq ortalyǵyn Nazarbaev atyndaǵy Dinder men órkenıetter arasyndaǵy dıalog ortalyǵy retinde qaıta qurýdy usynamyz. Osy bastamamyzǵa qoldaý bildiresiz dep senemiz. Shetelde osy saladaǵy ortalyqtar jaqsy jumys istep keledi. Nátıjesi de bar. Biz de osy tájirıbeni keńinen qoldanýymyz qajet. Sol sebepti Sizder qarsy bolmasańyz, biz atalǵan usynysty erteńgi sezdiń Delaratsııasyna engizeıin dep otyrmyz», - dedi Qasym-Jomart Toqaev.
Hatshylyq músheleri atalǵan bastamaǵa qarsylyq bildirgen joq.
Aıta keteıik, Mádenıetter men dinderdiń halyqaralyq ortalyǵy Qazaqstan Respýblıkasy Prezıdenti N.Á.Nazarbaevtyń Álemdik jáne dástúrli dinder lıderleriniń II sezindegi kótergen bastamalaryn júzege asyrýǵa qatysty josparyna sáıkes qurylǵan bolatyn. Ortalyq óz qyzmetin QR Ádilet mınıstrligi Din isteri komıteti aıasynda bastady. Odan keıin QR Mádenıet mınıstrliginiń Din isteri komıteti qaramaǵyna berildi. Artynan komıtet Din isteri agenttigi bolyp qaıta quryldy.
Búginde ortalyq QR Qoǵamdyq damý mınıstrligine qaraıdy. Onyń negizgi maqsaty - Qazaqstannyń mádenıetaralyq jáne konfessııaaralyq suhbat ortalyǵy retindegi rólin jańa deńgeıge kóterýge yqpal etý, Qazaqstannyń osy saladaǵy tájirıbesin halyqaralyq dárejede tanytý.
Álemdik jáne dástúrli dinder lıderleriniń kezekti sezi 10-11 qazan aralyǵynda ótedi. Sezdiń ashylýyna Serbııa prezıdenti Aleksandr Výchıch pen EQYU Bas hatshysy Tomas Gremınger qatysady.
Otyrysqa Memleket basshysy Nursultan Nazarbaev tóraǵalyq etedi.
