Nazarbaev: Ana tilimizdi túletip, ata dinimizdi oraltqan aıshyqty elmiz
«Qymbatty otandastar! Barshańyzdy elimizdiń eń uly merekemiz ári elimizdiń asqar asýy Táýelsizdiktiń 25 jyldyǵymen shyn júregimnen quttyqtaýǵa ruqsat etińizder. Biz 1991 jyly 16 jeltoqsanda Táýelsizdigimizdi jer júzine jarııalap, kúlli álemge pash ettik. Aldymen kóne túrkiniń bórili baıraǵynyń murageri kók týymyzdy BUU tórinde jelbirettik. Ánuranymyzdy álem kóginde áleýettik. Eltańbamyzdy máńgilik mórge aınaldyrdyq. Tól teńgemizdi engizip, Ata zańymyzdy qabyldadyq. Qarýly kúshterimizdi quryp, shekaramyzdy shegendedik. Memlekettik tilimizdi álemniń eń bıik minbesinen sóıletkizdik. Biz 1500 jyl buryn Kúltegin tusynda jazylǵan «Máńgilik el» uǵymyn jalpyulttyq ıdeıaǵa aınaldyryp, eldigimizdiń 15 ǵasyrlyq tamyryna nár berdik. Máńgi jasyl etip gúldendirdik», - dedi Elbasy.
Qazaqstan Prezıdenti tereń tarıhymyz ben myńjyldyq bolashaǵymyzdy sabaqtastyryp, Máńgilik el bolýdyń dara jolyna túskenimizdi de basa aıtty.
«Búgingi ana tilimizdi túletip, ata dinimizdi oraltqan aıshyqty elmiz. Taǵylymdy tarıhyn túgendegen joraly jurtpyz. Barsha qazaqtyń basyn biriktirgen bátýáli ultpyz. Biz dalamyz ben qalamyzdy birge kórkeıtken qýatty halyqpyz. Arqa tósine Táýelsizdiktiń sımvoly - Elordamyzdy ornatqan jasampaz jurtpyz. Dostyqtyń dara dástúrlerin damytqan birtutas ultpyz. Kórshimen tatý, shalǵaımen syılas ómir súrýdiń ónegesin kórsetken, salıqaly syrtqy saıasat júrgizgen ulaǵatty ulyspyz. Biz álemdik qarýsyzdaný isiniń tizginin ustaǵan kóshbasshy halyqpyz. Alys bolashaqqa kóz tikken mereıli memleketpiz», - dep atap ótti Nazarbaev.
