«Nazar aýdaryńyz – balalar!»: Úsh kúnde 16 myńnan astam fakti anyqtaldy
NUR-SULTAN. QazAqparat – «Nazar aýdaryńyz – balalar!» is-sharasy barysynda ereje buzýdyń 16 myńnan astam faktisi anyqtaldy. Bul týraly QR Іshki ister mınıstrliginiń resmı ókili Nurdildá Oraz málim etti, dep habarlaıdy QazAqparat tilshisi.
«Mektep demalysy qarsańynda, ótken aptada elimizde «Nazar aýdaryńyz – balalar!» atty aldyn alý is-sharasy ótti. Bul aktsııanyń maqsaty – balalardyń qatysýymen bolatyn jol-kólik oqıǵalarynyń aldyn alý. Atalǵan is-sharanyń alǵashqy úsh kúninde jol qozǵalysy erejelerin buzýdyń 16 myńnan astam jaǵdaıy tirkeldi. Onyń ishinde: 1 223 fakti jol qıylystarynan ótý erejelerin, 1 415 fakti jaıaý júrginshiler ótkelinen ótý erejelerin buzý. Balalardy tasymaldaý erejelerin buzýǵa qatysty 1 348 fakti esepke alyndy», - dedi ol Іshki ister mınıstrliginde ótken baspasóz máslıhaty barysynda.
Sonymen qatar resmı ókil polıtsııa qyzmetkerleri jol jáne kommýnaldyq qyzmet ókilderimen birlesip, jalpy bilim berý mekemelerine irgeles jatqan aýmaqtarǵa jaıaý júrginshiler ótkelderin jol belgilerimen, arnaıy tańbalarmen, qorshaýlarmen jáne jol qozǵalysyn retteýdiń basqa da tehnıkalyq quraldarymen jabdyqtaý boıynsha 4 myńnan astam tekserý júrgizgenin aıtty.
«Tekserý nátıjeleri boıynsha ýákiletti uıymdarǵa kemshilikterdi joıý boıynsha 1 704 nusqama berildi», - dedi Nurdildá Oraz.
