Naırobıdegi saýda ortalyǵynda lań salǵan sodyrlar áreketinde eshqandaı dinı astar jatqan joq - Ulybrıtanııa premer-mınıstri
ASTANA. 24 qyrkúıek. QazAqparat - Naırobıdegi saýda ortalyǵyna shabýyl jasaǵan «Ash-Shabab» somalılik sodyrlardyń basqa maqsatty kózdegenin, bul arada dinniń eshqandaı qatysy joqtyǵyna resmı túrde málimdeme jasaldy, dep habarlady muslim.kz.
Ulybrıtanııa premer-mınıstri Devıd Kemeronnyń aıtýynsha, Kenııa astanasynda lańkesterdiń beıbit túrǵyndardyń berekesin qashyryp, 59 adamnyń ómirin qıǵan qanquıly áreketinde eshqandaı da dinı astar jatqan joq. «Qylmyskerler dinniń atyn jamylyp, ózderiniń tar túsinikterinen asa almaı, lańkestik áreketke jol berdi»,- deıdi bul jaıynda premer-mınıstr.
«Jaǵdaı ýshyǵyp tur. Jaǵymsyz jańalyqqa daıyn bolýymyz kerek»,- dedi ol sózin tolyqtyryp.
«Ash-Shabab» toby mundaı qadamǵa Somalı aýmaǵyndaǵy kenııalyq sarbazdardyń ózderine qarsy júrgizgen áskerı shabýyldaryna kek qaıtarý maqsatynda barǵandaryn jetkizdi. Olardyń bul málimdemesine jaýap retinde brıtandyq Syrtqy ister mınıstri Ýılıam Heıg Somalıde tynyshtyq pen turaqtylyq ornamaıynsha qol qýsyryp qarap otyrmaıtyndaryn aıtty.
21 qyrkúıekte qarýly top Naırobıdegi "Ýestgeıt" saýda ortalyǵyna basa-kóktep kirip, adamdarǵa oq jaýdyrǵan bolatyn. Jaýǵan oqtyń astynda qalǵan beıbit turǵyndar arasynan 59 adam qaza taýyp, 300-ge tarta adam jaraqat aldy. Opat bolǵandardyń arasynda sheteldikterdiń qarasy kóp. 30-ǵa jýyq adam kepildikke alyndy. Lańkester birden ózderiniń talaptarymen tanystyra qoımady. Keıbir málimet kózderine qaraǵanda, saýda ortalyǵynyń ishinde qarýlanǵan sodyrlar sany shamammen10-15 bolǵan. Qutqarý operatsııasyna ızraıldik jaýyngerler de tartylǵanyn aıta ketý kerek.
