Naıdjel Doýs Qazaqstan quramasynda oınaýdan bas tartty
NUR-SULTAN. QazAqparat - 25 sáýirde Astanadaǵy «Barys-Arenada» A tobyna kiretin erler komandalary arasyndaǵy I dıvızıon boıynsha Álem chempıonaty ótedi. Qazaqstan quramasy atalǵan básekege daıyndyq sharalaryn bastady, dep xabarlaıdy QazAqparat tilshisi.
Ulttyq quramanyń bas bapkeri Andreı Skabelkanyń aıtýynsha, komandanyń keńeıtilgen tiziminde Talǵat Jaılaýov ta bar. Ol qazirgi kezde jattyǵýǵa kirisip ketti. Endi, komanda basshylyǵy onyń daıyndyǵyn baıqaıdy. Hokkeıshi ózin jaqsy kórsete bilse, negizgi quramǵa enetin bolady. Al Qazaqstan azamattyǵyn alǵan kanadalyq Naıdjel Doýs chempıonatqa qatysýdan bas tartty.
«Biz Naıdjel Doýsqa da usynys jasaǵanbyz. Biraq ol bas tartty. Kevın Dallmen jaıynda eshteńe aıta almaımyz. Ol úıine ketip qalǵan. Ázirshe, xabar joq. Roman Starchenko da chempıonatqa qatysa almaıdy. Sebebi qatty jaraqat aldy. Endi, alty aıdaı emdeledi. Sondyqtan ol tek qyrkúıekke qaraı komandaǵa qosylady», - dedi A.Skabelka Astanada ótken baspasóz máslıxatynda.
Roman Savchenko da Qazaqstannyń quramasynda óner kórsete almaıdy. Sebebi óz erkimen Reseı Federatsııasynyń azamattyǵyn aldy.
«Barys» klýbynyń prezıdenti Borıs Ivanışev te Naıdjel Doýstyń chempıonattan qatysýdan bas tartqanyna qatysty pikir bildirdi.
«Ol jaraqattaryn emdep, Qurlyqtyq xokkeı lıgasynyń kelesi kezeńine daıyndalmaqshy. Bizge kele almaımyn dep jazdy», - dedi B.Ivanışev.
Aıta keteıik, 35 jastaǵy Naıdjel Doýs jeti jyl boıy «Barys» xokkeı klýbynyń quramynda óner kórsetti. Osy ýaqyttyń ishinde ol birneshe ret Qurlyqtyq xokkeı lıgasynyń úzdik snaıperleri qatarynan kórindi.
Al 2016 jyly Qazaqstan azamattyǵyn alyp, ulttyq quramanyń namysyn qorǵaı bastady. Ótken jyly N.Doýs Reseıdiń «Avtomobılıst» komandasyna aýysyp ketti. Biraq Qazaqstan azamatty retinde Álem chempıonattarynda ulttyq quramanyń atynan óner kórsete alady.
