Navalnyı isine qatysty sanktsııalar EAEO elderine qanshalyqty áser etýi múmkin
Reseılik ekonomıst ári saıasatker, Eýrazııalyq ekonomıkalyq komıssııanyń ıntegratsııanyń negizgi baǵyttary jáne makroekonomıka jónindegi alqa múshesiniń mindetin atqarýshy Sergeı Glazev osy suraqqa jaýap berdi, dep habarlaıdy QazAqparat tilshisi.
«Bul sanktsııalar qazirgi ýaqytta Dúnıejúzilik saýda uıymynyń normalary men HVQ jarǵysyn óreskel buza otyryp, zańnamalyq sheńberden tys sıpatta salynyp jatyr. Jaqynda ótken Davos forýmy iskerlik ortada jáne kóptegen elderde sanktsııalardan bas tartý jónindegi halyqaralyq deńgeıdegi úlken kelisim bar ekenin kórsetti. Sanktsııalardan eshkimge paıda joq. Reseıge qarsy sanktsııalar Eýropalyq Odaqqa bizden de qatty zııan keltirdi dep aıta alamyn. ıAǵnı, sanktsııa degenińizdiń ózi - qos júzi bar qylysh», - dedi spıker.
Ol sanktsııalar jarııalanǵan bes jyldyń ishinde saýdaaralyq qatynastar qurylymynda aıtarlyqtaı ózgerister bolǵanyn atap ótti.
«Qytaımen saýda qarqyndy túrde ósip keledi. Biz odan bólek Ońtústik-Shyǵys Azııamen yntymaqtastyqtyń úlken múmkindikterin kórip otyrmyz. Vetnammen jáne Sıngapýrmen jumys isteıtin erkin saýda aımaǵyn quryp jatyrmyz. Úndistanmen, Iranmen de kelissózder júrgizilýde. Shyn máninde, Amerıka Qurama Shtattary sanktsııalardyń bastamashysy boldy. Al onyń álegi birinshi kezekte bizdiń Eýropalyq Odaqpen yntymaqtastyǵymyzǵa áser etedi. Biraq bul problemalar Shyǵystaǵy yntymaqtastyqtyń artýymen óteledi. Sanktsııalar búgin de álemdik ekonomıkada bolyp jatqan qurylymdyq ózgeristerdi kúsheıtedi. Búgingi tańda Ońtústik-Shyǵys Azııa elderindegi ekonomıkalyq belsendiliktiń jıyntyq kólemi óndiris pen saýda turǵysynan alǵanda AQSh pen Eýropalyq Odaqtan asyp túsedi. Meniń oıymsha, bul sanktsııa tez arada aıaqtalady. Biz barlyq memleketpen yntymaqtastyqqa daıynbyz», - dep qosty Sergeı Glazev.
Óz kezeginde Ónerkásip jáne agroónerkásip kesheni alqasynyń taǵy bir múshesi Kamalıan Artak sanktsııalardyń jaǵymsyz áseri qıyn ekenin jasyrǵan joq.
«Biraq sanktsııanyń oń áseri de bar. Bul otandyq óndirýshilerdi óz ónimin shyǵarýǵa yntalandyra túsedi. Eger biz aýyl sharýashylyǵy salasyn qaraıtyn bolsaq, Reseıde keıingi jyldary mal sharýashylyǵy turǵysynan san jaǵynan da, sapa jaǵynan da aıtarlyqtaı ósim bar. Árıne, mundaı sanktsııalar bolmasa jaqsy bolar edi, biraq eger ol bolsa, onda ekonomıkanyń naqty sektorynda ımportty almastyrýmen aınalysý kerek», - dep qosty Artak Kamalıan.
