Naýyrzym qoryǵyndaǵy órt sóndirildi
ASTANA. QazAqparat - Naýyrzym memlekettik tabıǵı parkinde bolǵan órt sóndirildi, dep habarlaıdy QazAqparat QR ІІM Tótenshe jaǵdaılar komıtetiniń resmı ókili Rýslan Imanqulovqa silteme jasap.
«Qostanaı oblysynda 500 gektarda dalanyń qýrap ketken shóbi jandy. Órt saǵat 02:10-da sóndirildi. Eshkim zardap shekpedi», - deıdi TJK resmı ókili.
Buryn habarlanǵanyndaı, Qostanaı oblysynyń Aqbulaq kentinen 15 shaqyrym jerde, dalada jáne ishinara Naýyrzym memlekettik tabıǵı parkiniń aýmaǵynda qýraǵan shóp órtengen. Jalyn jeldiń kesirinen jyldam taraldy.
Órtti sóndirýge tabıǵı qoryqtyń 44 qyzmetkeri jáne 14 tehnıkasy, sondaı-aq oblystyq TJD jeke quramynyń 17 qyzmetkeri men 3 arnaıy tehnıkasy jumyldyryldy.
Illıýstratsııalyq foto
