Naýryzǵa oraı Qazaqstannyń tanymal ánshileri Mońǵolııada óner kórsetedi
BAıAN-ÓLGEI. QazAqparat - Naýryz meıramy qarsańynda Qazaqstan Respýblıkasynyń birqatar tanymal ánshileri Mońǵolııanyń astanasy Ulanbatyr qalasynda jáne qazaqtar kóp shoǵyrlanǵan Baıan-Ólgeı, Qobda aımaqtarynda kontserttik keshterin ótkizbek, dep habarlaıdy QazAqparat.
Qazaqstannyń eńbek sińirgen óner qaıratkeri, ánshi Mádına Sádýaqasova, ánshi Ushqyn Jamalbekter naýryzdyń 14 -16 aralyǵynda Qobda, Baıan-Ólgeı aımaqtary jáne Ulanbatyr qalasynyń eń úlken kontsert zaly «UB palace» - ta jandy daýysta «Arman elim-aı» án keshin kórermenderge tartý etpek.
Kontsertti 2017 jyly ánshi Tóreǵalı Tóreáliniń «Uly dala balasy» keshiniń Mońǵolııada ótýine muryndyq bolǵan tájirıbeli top «Baıar ıntertaınment» kompanııasy uıymdastyrady. Al barsha tanymal ánshiler Maqsat Bazarbaev, Serjanáli Álibekterdiń «El kóshkende» atty án keshi naýryzdyń 20 - sy kúni Mońǵolııanyń astanasy Ulanbatyr qalasynda, 21-i kúni Baıan-Ólgeıde, naýryzdyń 22-si kúni Qobdada ónersúıer qaýymǵa usynylmaqshy.
Maqsat pen Serjanáliniń Ulanbatyrda ótetin kontsertine Mońǵolııanyń rok-pop juldyzdarynyń belgili ókilderi «Hýrd» toby, «Allo» ánin mońǵol tilinde shyrqap júrgen ánshiler Mońǵolııa mádenıet qaıratkerleri L.Sórólt, A.Túmen-Ólzıı jáne T.Amına qatysady dep josparlanǵan. Oǵan Ulanbatyrdaǵy Baıan-Ólgeı aımaǵynyń jerlester alqasy men Qazaq jastar damý ortalyǵy demeýshilik kórsetedi.
Al Nurbolat Abdýlınniń kontserti aıdyń 11-i kúni Baıan-Ólgeıde, 12-si kúni Ulanbatyr qalasynda qoıylady. Osylaısha alystaǵy qazaqtyń maýqyn basyp, rýhyn serpiltip, qazaq ánimen sýsyndatý úshin keletin óner juldyzdaryn shalǵaıdaǵy qazaqtar asyǵa kútýde.
Qýat Ýathan
