Naýryzdyń 22-si kúni Astanada birneshe joldar jabylady, azamattar úshin arnaıy qoǵamdyq kólik uıymdastyrylady - ІІD
ASTANA. Naýryzdyń 16-sy. QazAqparat /Gúlmıra Álıakparova/ - Naýryz meıramy atap ótiletin naýryzdyń 22-si kúni Astana qalasynda birqatar avtojolda qozǵalystar shekteledi. Merekelik is-sharalar ótetin oryndarǵa halyqty arnaıy avtobýstar jetkizip salatyn bolady. Bul týraly búgin ótken baspasóz máslıhatynda qalalyq Jol polıtsııasy basqarmasy bastyǵynyń orynbasary Baqytjan Malybaev aıtty,
dep habarlaıdy QazAqparat.
Buǵan deıin habarlanǵandaı, bıyl Naýryz meıramyn kópshilikpen atap ótý orny retinde «Han shatyr» saýda oıyn-saýyq ortalyǵynyń aýmaǵy belgilendi. Merekelik dýmandar sondaı-aq, qaladaǵy birqatar ashyq alańdarda uıymdastyrylady. Atap aıtqanda, «Otan qorǵaýshylar» eskertkishi, «Astana-Báıterek» monýmenti, «Atameken» etno-memorıaldyq kesheni, «Jastar» saraıy men «Qazaqstan» sport kesheni, Qarjy mınıstrligi men Elorda saıabaǵy. Áz-Naýryz Internatsıonaldy, Temirjol, Prıgorodnyı, Qaraótkel, Kóktal jáne Óndiris kentterinde de keńinen toılanbaq.
B.Malybaevtyń atap kórsetkenindeı, mereke kúnderi jekemenshik jáne qoǵamdyq kólikterdiń keptelisin boldyrmas úshin kelesi kóshelerde qozǵalystarǵa shekteý qoıylady: Qabanbaı batyr dańǵyly boıymen «Ramstor» saýda úıinen bastap 23-shi kóshege deıin; Saryarqa dańǵyly boıymen Kenesary kóshesinen Syǵanaq kóshesine deıin; Saraıshyq, Turan kóshelerinen Qabanbaı batyr dańǵylyna deıin.
Sonymen birge, avtokólikterdiń yńǵaıy úshin mádenı is-sharalar ótetin jerlerdi aınalyp ótetin baǵyttar qarastyrylyp otyr.
B.Malybaevtyń aıtýynsha, merekelik sharalar uıymdastyrylatyn oryndarǵa halyqty arnaıy avtobýstar jetkizip salatyn bolady. Olarǵa otyrǵyzý tańerteńgi saǵat 8-den bastap K.Baıseıitova atyndaǵy Ulttyq opera jáne balet teatrynan, «Jastar» saraıynan, qalalyq ákimshilik aldyndaǵy alańnan, «Qazaqstan» sport kesheniniń aýmaǵynan, Respýblıkalyq Gvardııa men Internatsıonaldy kentinen júrgiziledi.
Toı-dýman tolyǵymen aıaqtalǵanǵa deıin Turan dańǵyly men Saraıshyq kóshesiniń jáne Turan dańǵyly men Syǵanaq kóshesiniń qıylysynda avtobýstar kelesi baǵytta qatynaıtyn bolady.
Sondaı-aq, azamattar is-sharalar ótetin oryndarǵa emin-erkin jetýi úshin birneshe baǵyttar boıynsha (№10,12,18,21,27,28,30,35,40,41,42,43,116,117,118) qoǵamdyq kólikterge Qabanbaı batyr dańǵyly boıymen esh kedergisiz júrý múmkindigi jasalady.
