Naýryzdy ulttyq qundylyqtarǵa laıyqty deńgeıde ótkizý qajet - Ý. Qalıjan
ASTANA. 16 naýryz. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda depýtat Ýálıhan Qalıjan QR Memlekettik hatshysy-Syrtqy ister mınıstri Qanat Saýdabaevtyń atyna úndeý jasady.
«Áz Naýryzdyń halqymyzǵa qaıta oralǵanyna 22 jyldyń júzi boldy. Alǵashqy kezderi Naýryz meıramy shynynda da búkilhalyqtyq sıpatqa ıe bolyp, Qazaqstan halyqtarynyń ortaq merekesine aınalǵan edi. Elbasynyń jarlyǵymen Naýryz memlekettik merekelerdiń kúntizbesine engizildi. Halyq buǵan dán rıza. Biraq, atqarýshy bılik bul merekeniń ulttyq qundylyqtarymyzǵa enetin erekshe - Ulystyń Uly kúni ekendigin múldem umytqan sekildi. Bolmasa, ásem Astananyń bezendirilýine kóz salyp kórińizshi - Aldar kóseniń saqalyndaı «Naýryz qutty bolsyn!» degen seldir jarnamadan basqa eshteńe kórinbeıdi. Teledıdar tym bolmasa óz taraptarynan Naýryz týraly áleýmettik jarnama retinde mereke týraly aqparattar da bermeıdi», - deıdi depýtat.
Osyǵan oraı, Ý. Qalıjan Memlekettik hatshydan arnaıy komıssııa quryp, Naýryzdy toılaýdyń birtekti josparyn jasaýdy surady. Sonymen qatar ol, osy máselege qatysty óz usynystaryn da jetkizdi. «Mysaly, Qydyr ata - Aıaz atadan da qasterli. Sol babamyz Naýryz kúnderi úlken alańdarda, úılerde bolyp, jurtqa batasyn berip, balalarǵa syı-sııapat jasasa rýhanı ári ulttyq maqtanysh qalyptastyratyny sózsiz. Ádebıet, óner, sáýlet salasyndaǵy maıtalmandar Naýryzda marapattalsa ıgi edi. Osy kúnderi «Qyz syny», «Jigit sultany» atty konkýrstar márege jetip, halyq jınalǵan iri alańdarda solarǵa marapat tapsyrylsa, shara iri kontserttik baǵdarlamaǵa ulassa tárbıelik máni de óser edi. Ulystyń uly kúni qarsańynda batyr analarǵa Altyn alqa, Kúmis alqa syndy memlekettik nagradalar saltanatty jaǵdaıda tapsyrylyp, marapattalsa, Naýryzdyń mán mańyzy arta túsetinine kámil senemin. Etnografııalyq deńeıden jalpyulttyq merekege ulasatyn Naýryzdyń ulttyq qundylyqtarymyzǵa laıyqty deńgeıde ótkizilýine qamqorlyq jasalsa ıgi», - dedi depýtat Ý. Qalıjan.
