Naýryzdy toılaýǵa elimizdiń 7 óńirinen 350-den astam ónerpaz elordaǵa keledi
ASTANA. QazAqparat - Naýryzdy toılaýǵa arnalǵan negizgi sharalar "Qazaq eli" monýmentiniń qasynda ótedi. Bul týraly búgin Ortalyq kommýnıkatsııalar qyzmetinde ótken brıfıngte Astana qalalyq Mádenıet basqarmasynyń basshysy Bolat Majaǵulov málimdedi.
Onyń aıtýynsha, sharaǵa Almaty, Pavlodar, Aqtóbe, Atyraý, Jambyl, Soltústik Qazaqstan jáne Aqmola oblystarynyń óner ujymdarynan 350-den astam ónerpaz kelip qatysady.
"Negizi merekelik shara 21 men 22-si kúnderi eki kún boıy ótedi. Alańǵa 40 kıiz úı, 5 shatyr tigilip, úsh sahna ornatylady. Alańnyń bezendirilýi tabıǵatpen úndestirilip, jalpy kompozıtsııa "Jazǵyturymnan jazǵa deıin" dep atalady", - dedi B. Majaǵulov. Sonymen qatar, túrki halyqtarynyń aspazdyq óneri boıynsha saıys ótkizilip, orta Azııa halyqtaryna ortaq naýryz kóje jáne súmele daıyndalady.
