Naýryzdaǵy UBT-da talapkerlerdiń 70%-dan astamy shekti ball jınady
QR Bilim jáne ǵylym mınıstrliginiń málimetinshe, bul byltyrǵymen salystyrǵanda 6 paıyzǵa artyq. Al ortasha ball shamamen 69 baldy qurady. Eń joǵary ball – 135.
Naýryzdaǵy Ulttyq biryńǵaı testileýge barlyǵy 105 myńǵa jýyq adam qatysty. Onyń ishinde túlekterdiń 78,2 paıyzy qazaq, 21,7 paıyzy orys, 0,2 paıyzy aǵylshyn tilinde testileýden ótti. 72 talapker 130-dan joǵary ball jınady. Testileýge erekshe bilim berý qajettiligi bar 211 bala qatysty. Byltyr osy kezeńde kórý, estý, tirek-qımyl apparaty qyzmeti buzylǵan 35 talapker testileýden ótken bolatyn. Bıyl alǵash ret erekshe qajettiligi bar túlekterge testileý tapsyrmalaryn oryndaý úshin negizgi 240 mınýttan bólek, taǵy 40 qosymsha mınýt berildi.
Beıindik pánderdiń eń tanymal kombınatsııasy - «Matematıka-Fızıka» jáne «Hımııa-Bıologııa». Bul pánderdi qatysýshylardyń 27 jáne 19 paıyz tańdaıdy. Eń az tańdaý «Hımııa-Fızıka» kombınatsııasyna beriledi (0,12%).
«Naýryzdaǵy UBT suraqtarynyń formaty men sany ózgerissiz qaldy. Biraq biz úmitkerlerge birneshe qosymsha qyzmetti qostyq. Olardyń eń mańyzdysy - jeke taqyryptyq taldaý. Endi túlek testileýdi aıaqtaǵannan keıin jınaǵan upaı sany týraly ǵana aqparat alyp qoımaı, sonymen birge qandaı taqyryptardy biletini, qaısysyn tolyq bilmeıtini týraly qosymsha taldaýlar alady. Bul oqýshyǵa jeke taqyryptarǵa kóbirek ýaqyt bólýge jáne qatelermen jumys isteýge múmkindik beredi. Taǵy bir qyzmet – IT baǵyttaryna túsetinder úshin «Matematıka-Informatıka» kombınatsııasyn tańdaý. Fızıka bıyl negizgi pán bolyp qalatynyna jáne jańashyldyqtyń ózi 2022-2023 oqý jylynda engiziletinine qaramastan, naýryzdaǵy testileý kezinde bul kombınatsııany 800-ge jýyq adam tańdady. Sonymen qatar biz metaldardyń belsendilerin qosý arqyly paıdalanýǵa ruqsat etilgen tuzdyń erigishtigi kestesin jańarttyq. Bul jańalyqtyń barlyǵy test tapsyrýshylardyń pikirlerin eskere otyryp, sondaı-aq negizgi UBT-ǵa daıyndyq sapasyn arttyrý maqsatynda engizildi», - dedi Ulttyq testileý ortalyǵynyń dırektory Rýslan Emelbaev.
Byltyrǵy qańtar aıyndaǵy UBT-men salystyrǵanda tyıym salynǵan zattardy alyp kirý áreketter de azaıǵan. Smartfondardy, paraqtardy jáne basqa da tyıym salynǵan zattardy alyp kirý áreketi saldarynan testileýden ótý múmkindiginen 99 úmitker aıyryldy.
Esterińizge salaıyq, UBT-ǵa kirý úsh deńgeıli júıe boıynsha júzege asyrylady: Face ID tulǵany sáıkestendirý arqyly, jeke kýálik jáne otyrǵan adamnyń jeke basyn anyqtaý. Bıyl testileý «bir kompıýter – eki kamera – bir testileýshi» qaǵıdasy boıynsha júrgizilip jatyr. Testileý kezinde ereje buzǵany úshin 259 adam aýdıtorııadan shyǵarylyp, nátıjeleri joıyldy.
Osyǵan deıin bıyl kolledjderde bilim grantynyń sany 45 myńǵa artatynyn jazǵan edik.
