Naýryzdaǵy onlaın-festıval: júldegerler Qazaqstannyń kórikti jerlerine saıahattaıdy

ASTANA. QazAqparat – Mádenıet jáne sport mınıstrligi men TikTok platformasy Naýryz merekesine oraı onlaın-festıval ótkizedi. Qosymshany paıdalanýshylar Naýryz2023 heshtegimen ulttyq mereke, onyń erekshelikteri men ádet-ǵuryptar týraly vıdeorolıkter túsiredi. Bul týraly QazAqparat vedomstvonyń baspasóz qyzmetine silteme jasap habarlaıdy.

Naýryz adamdardy tabystyrady, onlaın-festıval qazaqstandyqtardy biriktirýge jáne ádet-ǵuryptarymyz ben salt-dástúrlerimizdi nasıhattaýǵa kómektesedi. Qazaq mádenıeti men tarıhyna arnalǵan rolıkter TikTok-ta tanymal bolyp keledi. Mysaly, #Qazaqstantarıhy boıynsha vıdeolar 100 mıllıonǵa jýyq, al #Qazaqstanmádenıeti – 75 mln astam qaralǵan. Sondyqtan, bul aktsııa tek Qazaqstanda ǵana emes, shetelde de múmkindiginshe kóp adamdy qamtýǵa arnalǵan

, - deıdi mınıstrliktiń resmı ókili Móldir Ábdýálıeva.

Chellendjge TikTok-ta tanymal kontent-meıkerler: mýzykanttar, aspazdar, saıahat blogerleri jáne tanymdyq vıdeo avtorlary qatysyp jatyr.

Úzdik vıdeorolıkterdiń avtorlary Kazakh Tourism kompanııasy usynǵan júldelerge ıe bolady. Alǵashqy úsh oryndy ıelengen qatysýshylar Qazaqstannyń eń ádemi jerlerine saparlaı alady. Jeńimpaz 5 kúnge, ekinshi jáne úshinshi oryn ıegerleri sáıkesinshe 3 kún jáne 1 kúnge saıahatqa shyǵady.

Vıdeorolık taqyryby retinde tórt baǵyttyń birin tańdaýǵa bolady: tamaq, saıahat, mádenıet jáne mýzyka.

Onlaın-festıvaldiń qorytyndysy, úzdik vıdeorolıkter men baıqaý jeńimpazdarynyń esimderi 29 naýryzda jarııalanady.