Naýryzdaǵy merekelerge oraı elordada mádenı-buqaralyq sharalar ótedi
Qala turǵyndary úshin «Jigitter» tobynyń eseptik kontserti naǵyz syı bolmaq, ol 8 naýryz kúni «Astana» kontsert zalynda saǵat 16:00-de jáne 19:00-de ótedi.
Merekeleý sheńberinde mýzeılerde, kitaphanalarda, teatrlarda, kontsert zaldarynda jáne Táýelsizdik saraıynda taqyryptyq kórmeler, spektaklder jáne kontsertter uıymdastyrylady.
Astana qalasy Mádenıet, muraǵattar jáne qujattama basqarmasynyń aqparaty boıynsha, Naýryz meıramyn merekeleý aıasynda Astanada 20-ǵa tarta mádenı shara ótkiziledi. Negizgi merekelik sharalar ashyq alańdarda uıymdastyrylady. Al meıramnyń sharyqtaý shegi 21-23 naýryz kúnderi «Han Shatyr» saýda oıyn-saýyq ortalyǵy mańynda, «Qazaq eli» alańynda, qalalyq alańda, «Stýdentter» baǵynda, «Jastar» teatrynyń (vokzal aýdany) aldynda jáne qalanyń barlyq turǵyn alaptarynda ótetin halyqtyq serýender bolmaq.
Budan basqa, mereke kúnderi qala turǵyndary men qonaqtary úshin qala teatrlarynda kontsertter, spektaklderdiń premeralyq kórsetilimderi, kórmeler uıymdastyrylady.
Atap aıtqanda, «Astana» kontsert zalynda 23 naýryzda «Shanshar» satıra jáne ázil keshi ótse, 25 naýryzda «Shalqyma» halyq bı ansambliniń, «Raýan» bı ansambliniń, klassıkalyq jáne estradalyq vokal solısteriniń qatysýymen «Bı álemi» kontserti ótedi.
Elordanyń qýyrshyq teatrynda «Naýryz týraly ańyz», «Qańbaq shal» jáne «Prıklıýchenııa Naýryzbeka» ertegileri qoıylady. Orys drama teatry da kishkentaı kórermender úshin mazmundy baǵdarlama usynbaq. Naýryz meıramyna oraı teatr «Domık dlıa tsarıa zvereı» jáne «Alenkıı tsvetochek» atty ertegiler sahnalanady.
