Naýryzda jyldyq ınflıatsııa 18,1 paıyzǵa deıin tómendedi
«Ulttyq banktiń boljaǵan traektorııasyna sáıkes, naýryzda jyldyq ınflıatsııa 18,1 paıyzǵa deıin tómendedi. Bul basqalarmen qatar ótken jylǵy joǵary bazanyń esepten shyǵýynan boldy. Inflıatsııanyń barlyq komponenti boıynsha da baıaýlaý baıqalady. Sonymen qatar, ońtústik óńirlerdegi ónimniń shyǵynǵa ushyraýy men úsik saldarynan jemis-jıdek pen kókónis baǵasynyń kóterilýi, sondaı-aq suranystyń joǵary bolýynan kólik qyzmeti qunynyń ósýi ınflıatsııanyń tómendeýin tejedi. Bıylǵy naýryzda azyq-túlik ınflıatsııasy aıtarlyqtaı baıaýlap, 20,5 paıyzdy quraǵanymen, jalpy ınflıatsııaǵa kóptep úles qosýyn jalǵastyryp keledi. Azyq-túlikke jatpaıtyn taýarlar baǵasynyń ósimi - 18,1 paıyzǵa deıin, qyzmetter baǵasynyń ósimi - 14,4 paıyzǵa deıin baıaýlady», - dedi ol.
Onyń atap ótýinshe, aqpan aıyndaǵy aılyq ınflıatsııanyń birshama jedeldeýi baǵalardyń tómendeý trendin buzǵan bolatyn.
Alaıda, keıin aılyq ınflıatsııa 0,9 paıyzǵa deıin baıaýlady. Bazalyq ınflıatsııanyń ártúrli baǵalaýlary da báseńdep keledi.
Biraq olar áli de joǵary proınflıatsııalyq ortanyń saqtalýyn kórsetip otyr.
Máselen, jemis-jıdek pen kókónis ónimderine, retteletin qyzmetter men qýat kózderine baǵa ósiminiń áserin eskermeıtin maýsymdyq faktorlardan tazartylǵan jyldyq bazalyq ınflıatsııa 19,9 paıyzdy qurady.
Degenmen, ol tarıhı ortasha kórsetkishten joǵary qalyptasýyn jalǵastyryp keledi.
«Inflıatsııalyq kútýler qańtar-aqpan aılarynda tómendegennen keıin qaıta qarqyn aldy. Kútiletin ınflıatsııanyń medıanalyq kórsetkishi 16,5 paıyz boldy. Saýalnama derekteri boıynsha, ınflıatsııanyń negizgi faktorlary – azyq-túlik pen otyn baǵasynyń ósýi, syrtqy jaǵdaı, teńgeniń aıyrbastaý baǵamynyń dınamıkasy jáne jalaqy men zeınetaqynyń ósýi. Joǵary jáne qubylmaly ınflıatsııalyq kútýler de – ınflıatsııanyń tómendeýin tejeıtin negizgi faktorlardyń biri», - dedi Ǵalymjan Pirmatov.