Naýryzda teńgedegi depozıt ıelerine 307 mlrd teńge ótemaqy tólenedi

ASTANA QazAqparat – Naýryzda teńgemen depozıt ustaǵan 2 mln 623 myń salymshyǵa 307 mlrd teńge ótemaqy tólenedi. Bul týraly Ulttyq bank tóraǵasy Ǵalymjan Pirmatov málim etti, dep habarlaıdy QazAqparat tilshisi.

«Depozıtin teńgemen saqtaǵandardyń ótemaqy alýǵa beretin ótinishin qabyldaý merzimi uzartylǵan bolatyn. Jalpy, osy ýaqyt ishinde 125 myń salymshy uzartylǵan merzimdi paıdalandy. Sońǵy derek boıynsha, aldyn ala ólshem mynadaı: 2 mln 623 myń salymshydan jalpy somasy 307 mlrd teńge bolatyn ótinim jınaldy. Tólenýi yqtımal ótemaqynyń jalpy somasy 4 mlrd teńgemen tolyqty. Qazirgi tańda jalpy soma 307,5 mlrd teńge dep baǵalanyp otyr», - dedi Ulttyq bank basshysy.

Aıta keteıik, Ulttyq banktiń aqsha-kredıt saıasaty komıteti bazalyq mólsherlemeni 16,75% deńgeıinde qaldyrý jóninde sheshim qabyldady.