Naýryzda ShQO taýlarynan 500 myń tekshe metrden astam qar túsirildi

ÓSKEMEN. QazAqparat – Shyǵys Qazaqstan oblysynda naýryz aıynyń basynan beri jasandy jolmen 514 800 tekshe metr qar túsirildi, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, qazirgi ýaqytta óńirdegi taýly aımaqtarda kóshkin júrý qaýpi áli de bar.

«Qazseldenqorǵaý» ShQOF qyzmetkerleri sońǵy bir apta boıy kún saıyn jasandy jolmen qar kóshkinin júrgizýde. Tek 1 naýryzdan bastap kóshkin qaýpi bar 34 ýchaskede 514 800 tekshe metr qar túsirilgen. Jalpy qys bastalǵaly beri barlyǵy 74 profılaktıkalyq kóshkin jasalyp, 541 980 tekshe metr qar tústi.

«Kóktem shyqqanda qar kóshkini qaýpi óte joǵary bolady. Ásirese naýryz aıynda qubylmaly aýa raıy men qatty jeldiń saldarynan taýly aımaqtarda kóshkin júrýi yqtımal. Búginde oblystaǵy 336 ýchaskede kóshkin kólik joldary men eldi mekenderge qaýip tóndirip tur», - delingen habarlamada.

Osy rette, TJD mamandary óńir turǵyndaryna taýly jerlerge barmaýǵa keńes beredi.