Naýryzda Qazaqstannyń áleýmettik damýy jańa tujyrymdamasynyń birinshi nusqasy ázirlenedi - E.Orynbaev
ASTANA. 7 aqpan. QazAqparat - Aǵymdaǵy jyldyń naýryzynda Elbasy tapsyrmasymen qolǵa alynǵan Qazaqstannyń áleýmettik damýy jańa tujyrymdamasynyń birinshi nusqasy ázirlenedi.
Bul týraly búgin QR Eńbek jáne halyqty áleýmettik qorǵaý mınıstrliginiń alqa májilisinde QR Premer-Mınıstriniń orynbasary Erbol Orynbaev málim etti.
«Men mınıstrlik (EHÁQM) Ekonomıka jáne bıýdjettik josparlaý mınıstrligimen birlesip, tujyrymdamany Parlamentte tanystyrýdy, ony úkimettik emes uıymdarmen, múddeli memlekettik organdarmen jáne jeke uıymdarmen talqylaýdy usynamyn», - dedi ol.
Sonymen qatar E.Orynbaev mamyr aıy ishinde tujyrymdama jan-jaqty talqylaýǵa ári Úkimettiń qabyldaýyna daıyn bolýy kerektigin basa aıtty. Onyń atap ótýinshe, tujyrymdama Dúnıejúzilik bank mamandarynyń kómegimen ázirlenýde jáne sapaly jańa áleýmettik standarttardy engizýdi kózdeıdi.
