«Naýryzda Qazaqstan azamattaryna ulttyq kıim kııýdi mindetteý kerek pe?» - BAQ-qa sholý
***
«Qalyptasqan memleketimizdiń jańa saıası baǵytyn aıqyndaıtyn "Qazaqstan-2050" Strategııasynda Elbasy Nursultan Nazarbaev adamzat órkenıetin HHІ ǵasyrda kútip turǵan on jahandyq syn-qaterdi atap aıtqan bolatyn. Áıtse de, olardyń bir-birimen óte tyǵyz baılanysty ekenine qaramastan, erekshe mán berýge suranyp turǵan úlken syn-qater Úshinshi ındýstrııalyq revolıýtsııa ekeni kúmán týdyrmaıdy. Óıtkeni, adamzat órkenıeti qazir álgi revolıýtsııanyń tabaldyryǵynda tur», - dep jazady Senat depýtaty Ádil Ahmetov «Egemen Qazaqstan» gazetiniń búgingi sanynda jaryq kórgen «Úshinshi ındýstrııalyq revolıýtsııa bizden qandaı ázirlikti talap etedi?» degen taqyryptaǵy maqalasynda. Senator alǵa tartqan resmı derekter boıynsha, qazirgi kezde álemde 442 atom reaktory elektr energııasyn óndiredi. Olardyń ishinde: AQSh-ta - 104, Frantsııada - 59, Japonııada - 54, Reseıde - 31, Ulybrıtanııada - 23, Germanııada - 19, Ońtústik Koreıada - 16, Kanadada - 14, Ýkraınada - 13, Shvetsııada 11 reaktor jumys istep tur. Elektr energııasyna suranysynyń 50 paıyzdan joǵary mólsherin AES arqyly qamtamasyz etetin bes memlekettiń qataryna Lıtva (80%), Frantsııa (76%), Slovakııa (57%), Belgııa (55%) jáne Shvetsııa (51%) jatady.
Osy basylymnyń jazýynsha, Qazaqstan Prezıdenti Nursultan Nazarbaev birqatar memleket basshylaryna Naýryz merekesine baılanysty quttyqtaý jedelhatyn joldady. Atap aıtqanda, jedelhat Ázerbaıjan Respýblıkasynyń Prezıdenti Ilham Alıevke, Aýǵanstan Islam Respýblıkasynyń Prezıdenti Hamıd Karzaıǵa, Iran Islam Respýblıkasynyń Prezıdenti Mahmud Ahmadınejadqa, Qyrǵyz Respýblıkasynyń Prezıdenti Almazbek Atambaevqa, Tájikstan Respýblıkasynyń Prezıdenti Emomalı Rahmonǵa, Túrkimenstan Prezıdenti Gýrbangýly Berdimuhamedovke, Ózbekstan Respýblıkasynyń Prezıdenti Islam Karımovke joldandy.
***
Qasıetti Jer-ana aq kórpesin ysyryp tastap, jasyl jelekti kóılegin kıdi. Kúnniń kózi kúlimdep, ǵalam meıirimdi bir ananyń keıpine enip, tirshilik ataýly jańaryp, jańǵyryp jatyr. Áz-Naýryzda tól jańa jylymyz da bosaǵamyzdy attap, adamzat ataýly shat-shadyman kúıge engen. Aq jaýlyqty analarymyz qystan qalǵan bar jyly-jumsaǵyn qazanǵa salyp, naýryz kóje pisirip, máre-sáre. Árıne, ár qazaq balasy jylystap jetken Jylan jylynan tek jaqsylyq kútetini haq. Sol úmit etken jaqsylyqtyń baıandy bolmaǵy, Áz-Naýryz óz bıiginen, óz oryntaǵynan kórinýi úshin ne istemek kerek? Máselen, tóte joldy «Alash aınasy» gazetiniń tilshisi «Áz-Naýryzdy shekarany jaýyp tastap toǵyz kún toılaý kerek pe?» degen saýaldan izdeıdi. Tilshi osy máselege baılanysty óz oı-tolǵanystaryn aıta kele naqty faktilerdi de keltiredi.
Álemniń birqatar elderinde ulttyq kıimdi mindetteıtin ishki tártip bar. Ásirese sheneýnikterge qatysty mysaldardy kóptep keltirýge bolady. Alysqa barmaı-aq Grýzııa, Qyrǵyzstan, Túrkimenstan elderinen ulttyq kıimdi mindetteýdiń ár túrli joldaryn kórýge bolady. Jyl on eki aı qazaqy oıý tańbalanǵan kıim kıip júrýdi mindettemesek te, dástúrli merekelerimizde qazaqsha kıinetin úrdis qalyptastyrýǵa bola ma? Bul bir jaǵynan jastarǵa ónege bolarlyq bastama. Alaıda bireýler muny adam quqyna nuqsan keltiredi degendi aıtsa, endi bireýler bul shara tól rýhanııatymyzdy jańǵyrtatyn, tárbıelik máni bar usynys degendi alǵa tartady. «Alash aınasy» gazetiniń «Naýryzda Qazaqstan azamattaryna ulttyq kıim kııýdi mindetteý kerek pe?» degen saýalyna Dúnıejúzi qazaqtary qaýymdastyǵy tóraǵasynyń orynbasary, jazýshy Sultanáli Balǵabaev qosylatynyn aıtyp, «Iıa» dep jaýap berse, al qarsy pikirdi eks-depýtat, qoǵam qaıratkeri Tasbaı Sımambaev myqtap ustanyp, «kóterilgen ol taqyryp adam quqyn buzýmen para par» dep otyr.
