Naýryzda Astana Opera sahnasynda Bethoven mýzykasy shyrqalady
NUR-SULTAN. QazAqparat - Naýryz aıynda «Astana Opera» kameralyq zalynda tyńdarman nazaryna uly kompozıtor Lıýdvıg van Bethovenniń 250 jyldyǵyna arnalǵan jarqyn mýzykalyq jobalar usynylady, dep habarlaıdy QazAqparat teatrdyń baspasóz qyzmetine silteme jasap.
10 naýryz saǵat 19.00-de «Qazaqkvartet shaqyrady» toptamasynan «Bethovenge tartý» mýzykalyq keshi ótedi. Kontsertter serııasy aıasynda Ǵ.Jubanova atyndaǵy Memlekettik ishekti aspaptar kvartetiniń ártisteri nemis klassıginiń barlyq 16 kvartetin oryndaýǵa nıetti. Baǵdarlamaǵa L. van Bethovenniń №3 ishekti aspaptar kvarteti, re major, or.18, №8 ishekti aspaptar kvarteti, mı mınor, or.59, №2, sondaı-aq №14 ishekti aspaptar kvarteti, do-dıez mınor, or.131 engen. Mýzykanttar Aıdar Toqtalıev (1-shi skrıpka), Alekseı Lebedev (2-shi skrıpka), Bekzat Saılaýbaıuly (alt) jáne ujymnyń kórkemdik jetekshisi Qazaqstannyń eńbek sińirgen qaıratkeri Ernar Myńtaev (vıolonchel) kvartet faktýrasyn tamasha meńgergendikterin pash etpek.
12 naýryz saǵat 19:00-de «Mýzyka jáne onyń shyǵarýshylary týraly» toptamasyndaǵy «Alystaǵy súıiktime» kontsertinde áıgili kompozıtordyń vokaldyq ári aspaptyq mýzykalary oryndalatyn bolady. Kameralyq zal sahnasynda «Astana Opera» solısi Mádına Islamova (soprano), teatrdyń jetekshi solısi, Qazaqstannyń eńbek sińirgen qaıratkeri Jan Tapın (tenor), Gúlnara Tileýǵabylova (alt), Danııar Esimhanov (fortepıano) óner kórsetedi. Fortepıano partııasynda – Raýshan Beskembırova. L. van Bethovenniń «Alystaǵy súıiktime» vokaldyq toptamasy, «25 shotland halyq áni» toptamasynan The sweetest lad was Jamie, «Fıdelıo» operasynan Marselınanyń arııasy, Alt pen fortepıanoǵa arnap óńdelgen Romans, fa major, Fortepıanoǵa arnalǵan 32 varıatsııa, do mınor, Fortepıanoǵa arnalǵan 11 jańa bagatel syndy shyǵarmalary shyrqalady.
26 naýryz kúni saǵat 19:00-de «Astana Opera» orkestriniń solısi ári kontsertmeısteri, Qazaqstannyń eńbek sińirgen qaıratkeri Baǵdat Ábilhanov ataqty kompozıtordyń mereıtoıyna arnalǵan kontsertter toptamasyn ashady. Tanymal skrıpkashy nemis mýzykasy kemeńgeriniń skrıpka men fortepıanoǵa arnalǵan barlyq 10 sonatasyn oryndaıdy. «Mahabbat monologtary» mýzykalyq keshinde Baǵdat Ábilhanovpen birge qazaqstandyq pıanıst, halyqaralyq baıqaýlardyń laýreaty Saltanat Ábilhanova óner kórsetedi.
