#NaýryzChallenge: Qostanaılyq kásipkerler birneshe otbasyǵa baspana syılady
QOSTANAI. QazAqparat - Qostanaılyq kásipkerler Naýryz meıramy qarsańynda az qamtylǵan birneshe otbasyǵa páter syılady, dep habarlaıdy QazAqparat «Nur Otan» partııasy oblystyq fılıalynyń baspasóz qyzmetine silteme jasap.
Ulystyń uly kúni qarsańynda «Nur Otan» partııasy men jergilikti kásipkerler Elızavetınka aýylyndaǵy eki qabatty úıdiń úsh bólmeli páterin Myrzashevtar otbasyna syıǵa tartty. Ábdibek jáne Symbat Myrzashevtar Naberejnyı aýyldyq okrýgynda turady. 2011 jyly Ózbekstannan úlken otbasymen kóship kelgen. Aǵaıyn-týysqandarynyń bári osynda.
«Men úı sharýasymen aınalysamyn, al joldasym jergilikti seriktestikterdiń birinde jumys isteıdi. Buǵan deıin jaldamaly, shaǵyn úıde turaǵanbyz. Endi qýanyshymyzda shek joq. Januıada tórt bala bar. Eń kishisi 10 aılyq», - dep bólisti Symbat Myrzasheva.
Qonys toıyn toılaǵandardyń arasynda Taran aýdany Áıet aýylynan úsh januıa bar. Máselen, Smotrovtar otbasy 6 balany tárbılep otyr. Buǵan deıin turǵylyqty úıleri bolmaǵan. Sol sııaqty, Medvedev jáne Qanabaevtar otbasy da Naýryz merekesi qarsańynda tosynsyıǵa ıe boldy.
Taran aýdandyq fılıaly tóraǵasynyń birinshi orynbasary Aınash Dadanovanyń sózinshe, jergilikti metsenattar #NaýryzChallenge bastamasyna qoldaý bildirgen.
«Jalpy,Taran aýdanynda áleýmettik osal toptaǵy 142 otbasy bar. 25 myń adam turatyn aýdanda bul kóp emes. Onyń 120-sy - kópbalaly januıa. Arnaıy júrgizilgen tekserister nátıjesinde 7 otbasy baspanaǵa muqtaj ekenin bildik. Olardyń altaýy endi óz úılerinde turady», - dedi ol.
Buǵan deıin habarlaǵanymyzdaı, Taran aýdanynyń Tobyl eldi mekeninde taǵy bir kópbalaly otbasyna turǵyn úı kilti tapsyryldy.
