#NaýryzChallenge: Qostanaılyq kásipker tsıfrly tehnologııalar kabınetin ashty
Tsıfrly tehnologııalar kabıneti IT salasyn meńgerýge bir qadam jaqyndatady. Endi Qostanaı oblysynyń Taran aýdanynda robotehnıka salasyn meńgeremin deıtin oqýshylardyń sany odan ári arta túspek. Sebebi Asenkrıtov orta mektebinde «Nur Otan» partııasynyń 20 jyldyǵy men «Naýryz» merekesine oraı zamanaýı IT-tehnologııa kabıneti ashyldy.
«Tsıfrly kabınet ashý úshin Asenkrıtov orta mektebi arnaıy tańdap alyndy. Bul mektepke aýdandaǵy barlyq mektep oqýshylary lezde kele alady. Aýyldarmen araqashyqtyǵy teń. 2,5 mln teńgeden astam qarajat kabınetti arnaıy qurylǵylarmen jabdyqtaýǵa jumsaldy. Bul Naýryz merekesi qarsańynda oqýshylarǵa jasalǵan arnaıy syılyq», - deıdi «Nur Otan» partııasy oblystyq fılıalynyń baspasóz hatshysy Erbolat Ahanov.
Zamanýaı oqý kabınetin «Maılın» JShS dırektory Vladımır Býshkın ashyp berdi. Ol Asenkrıtov bastaýysh partııa uıymyn basqarady. Tsıfrly tehnologııalar kabınetinde 11 noýtbýk, proektor, ınteraktıvti taqta, robototehnıkaǵa arnalǵan jabdyqtar bar.
Al byltyr metsenattardyń qarajaty esebinen oblysta jalpy quny 172,2 mıllıonǵa 21 IT-tehnologııa kabıneti ashylǵan bolatyn.
