Naýryzbaı aýdanynyń jańa ákimshilik ortalyǵy paıdalanýǵa berildi - Almaty
ALMATY. QazAqparat - Almatyda Naýryzbaı aýdanynyń jańa ákimshilik ortalyǵy men birqatar əleýmettik nysandary paıdalanýǵa berildi, dep habarlaıdy QazAqparat tilshisi.
Atap aıtqanda, iskerlik ortalyqta jergilikti ákimdik, sot, prokýratýra, HQKO, AHAJ, Qazposhta, bank, zeınetaqy tóleý ortalyǵy, memlekettik kiris jáne ádilet basqarmalary ornalasqan.
Qurylys barysynda 95% qazaqstandyq qurylys materıaldary paıdalanyldy.
«Naýryzbaı aýdany ortalyqtandyrý prıntsıpi boıynsha damýda. Jańa ákimshilik ortalyqtyń ashylýy arqasynda barlyq memlekettik qyzmet bir jerden kórsetiledi. Bolashaqta bul aımaqta jańa sport jáne mádenı obektiler, turǵyn úıler, bala baqshalar salynyp, jańa jumys oryndary ashylady. Jyl aıaǵyna deıin 123 km sý qubyry, 80 km káriz jelisi tartylady «Nurly jer» baǵdarlamasy aıasynda 21 kóppáterli úı salý josparlanǵan. 496 páteri bar 7 úı qyrkúıek aıynda iske qosylady. Osynyń barlyǵy aýdannyń ınvestıtsııalyq tartymdylyǵyn arttyryp, qyzmet kórsetý sapasyn jalpyqalalyq standartqa jetkizedi jáne 160 myńǵa jýyq turǵynnyń áleýmettik jaǵdaıyn jaqsartady», -dep atap ótti Almaty ákimi Baýyrjan Baıbek.
Bıyl Memleket basshysynyń Naýryzbaı aýdanyn qurý týraly Jarlyǵyna 3 jyl toldy. Osy kezeń ishinde aýdanda 188 km jol jóndeldi, kópáterli 64 turǵyn úı ortalyq jylý júıesine qosyldy. Aýdan gazben 100% qamtyldy. 2 mektep, 3 emhana, salyndy, MJÁ aıasynda 33 bala baqsha, 17 sport jáne balalar alańdary ashyldy. Aýdanda salyq túsimi 11 ese, ShOB obektileri 4 ese ósti.
Jańa oqý jylynan bastap «Týǵan jer» baǵdarlamasy aıasynda «Sábı» jeke qaıyrymdylyq qorynyń qarjysy esebinen 1 200 oryndy jańa №174 mektep ashylady.
«Zavod Elektrokabel» JShS qarjysyna salynǵan 500 adamǵa shaqtalǵan emhana bir aıdan astam ýaqyttan beri qyzmet kórsetýde.
Aýdandy abattandyrý boıynsha birqatar jumys júrgizildi.
Qarǵaly ózeniniń jaǵalaýyn nyǵaıtý úshin jalpy uzyndyǵy 7,7 km qurylys jumystary atqaryldy.
Bulardan ózge, Jandosov kóshesi, Saın kóshesinen Taýsamaly eldi mekenine deıin uzyndyǵy 2,08 km jol kúrdeli jóndeýden ótýde. Mundaǵy kólik qozǵalysy joly keńeıip, 4 jolaqty bolady.
