Naýryz ultymyzdyń tarıhı tamyrymen, qıly taǵdyrymen birge jasap keledi - Álıhan Smaıylov

NUR-SULTAN. QazAqparat - QR Premer-Mınıstri Álıhan Smaıylov qazaqstandyqtardy Naýryz meıramymen quttyqtady, dep habarlaıdy QazAqparat.

«Qurmetti qazaqstandyqtar!

Sizderdi Ulystyń uly kúni – Naýryz meıramymen shyn júrekten quttyqtaımyn! Tabıǵatty túletip, tirshilik ataýlyǵa jan bitirgen áz-Naýryz – eńsesi bıik eldigimizdiń, bereke-birligimizdiń merekesi.

Ultymyzdyń tarıhı tamyrymen, qıly taǵdyrymen birge jasap kele jatqan ulyq mereke búginde búkil adamzat balasyn beıbitshilikke, izgilikke úndeıtin rýhanı qundylyǵymyzǵa aınaldy.

Táýelsizdik tarıhynda asa kúrdeli kezeńdi bastan keshirgen halqymyz úshin jańarǵan jyl bastaýy ıgi jaqsylyqtardyń jarshysy, irgeli isterdiń jalǵasy bolsyn.

Jańa damý kezeńine bet alǵan egemen elimizdiń qýaty arta bersin. Kórikti kóktem merekesi shańyraqtaryńyzǵa shattyq, kóńilderińizge qýanysh syılasyn.

Barshańyzǵa zor densaýlyq, otbasylaryńyzǵa baqyt, eńbekterińizge tabys tileımin. Ulys oń, aq mol bolsyn!» delingen Úkimet basshysynyń quttyqtaýynda.