Naýryz Shymkentte toǵyz kún boıy toılandy
Bıyl Shymkentte naýryznama dástúri zamanaýı úlgide jańartylyp, toǵyz kún túrli ataýmen merekelenip jatyr. Ár kún ózindik sıpaty, ózindik ereksheliktermen uıymdastyrylýda. Sondaı-aq, «Ulttyq taǵamdar», «Nauryz Fashion Day» jáne «Gastronom Fest» festıvali ótti.
Búgin, Ulystyń uly kúnine oraı, úshinshi megapolıste 10 jerde merekelik baǵdarlamalar ótip, turǵyndar men qala qonaqtaryna kóterińki kóńil-kúı syılady.
«Naýryz-Dýman» atty merekelik shara «Shymqala» etnoaýylynan bastaý aldy. Tarıhı keshende ótken sharaǵa qala ákimi Murat Áıtenov qatysyp, turǵyndardy Ulystyń uly kúnimen quttyqtady.
Merekede respýblıkaǵa tanymal estrada ánshisi Aıgúl Imanbaeva men «Hazar» ulttyq-folklorlyq toby jáne dástúrli ónerdiń kórnekti ókilderi ánnen shashý shashty.
Naýryz kúni Shymkenttiń ortalyq saıabaǵyna kóp halyq jınaldy. Bul jerde Ál-Farabı aýdany ákimdigi, qalalyq basqarmalar men ózge de mekemeler kıiz úı tigip, qonaqtarǵa Naýryz kóje men ulttyq taǵamdardy usyndy.
Ortalyq saıabaqqa kelgen turǵyndar kir tasyn kóterý, láńgi, arqan tartý jáne ózge de ulttyq sport túrleri men oıyndar boıynsha ótken saıystardy tamashalady.
Shahar basshysy atalǵan eki merekelik sharada da táı-táı basqan sábılerdiń tusaýyn kesip, olarǵa aq jol tiledi.
Naýryz toıyn joǵary deńgeıde toılaýǵa Shymkent qalalyq Qazaqstan halqy Assambleıasy men etnomádenı birlestikter de óz úlesterin qosty.
Assambleıa ǵımaratynyń aldyna kız úı tigilip, dastarhan jaıyldy.
Munan bólek, Shymkenttegi Arbatta qolóner buıymdarynyń jármeńkesi uıymdastyrylsa, Ál-Farabı alańynda Marjan Arapbaeva, Turar Rahymberlın, Aqerke Tájibaeva syndy otandyq estrada juldyzdary óner kórsetti. Jınalǵan jurt Naýryz kójeden dám tatty.
Naýryz merekesine oraı dendrosaıabaqta talantty jastardyń qatysýymen túrli baıqaýlar men ınteraktıvti eko-baǵdarlamalar uıymdastyryldy.
«Shymkent Tsırktiń» aldyna jınalǵan kópshilik tsırk ártisteri men saıqymazaqtardyń jáne akrobattardyń ónerin tamashalaý múmkindigine ıe boldy.
Sonymen qatar Jeńis, Metalýrgter saıabaqtarynda jáne Qajymuqan atyndaǵy ortalyq stadıonnyń aldynda merekelik is-sharlar ótip, qala turǵyndaryna kóterińki kóńil kúı tartý etti.
