Naýryz meıramynda Qydyr baba men Umaı anany keńinen dáripteýge tıispiz - A.Smaıyl
Toqtala ketetin jaıt, taıaýda Mádenıet jáne sport mınıstri Arystanbek Muhamedıulynyń Naýryz meıramyna ulttyq mazmun berý týraly tujyrymdamasy baspasózde jarııalanǵan bolatyn. Osyǵan oraı, depýtat mınıstrdiń usynysyna tolyq qosyla otyryp, dástúrli merekeni folklorlyq-etnografııalyq aýqymnan jalpy qazaqstandyq mereke dárejesine kóterýdi alǵa tartady.
«Naýryz ben onyń tarıhy jaıynda aıtqanda, aldymen Qydyr baba men Umaı ana jaıly sóz qozǵaýǵa tıispiz. Qydyr qazaqtyń sondaı-aq basqa da túrki tildes halyqtardyń erekshe jarylqaýshy qasıetke ıe áýlıesi. Bul kúnderdiń kúninde «qyryqtyń biri» bolyp jolyǵyp, baǵyńdy jandyrady. Sondyqtan júzdeskenniń bárin kemsitpeı, iltıpat kórsetý kerek. Qydyr bul turǵyda adam balasyn ózara tabystyrýshy, alys-jaqyndy jalǵastyrýshy kıeli tulǵa», - dedi A.Smaıyl.
Sonymen qatar depýtat Umaı ananyń túrki tektesterdiń arasynda Haýa anadan keıingi uly anasy ekenin, áıel men balanyń piri ekenin eske saldy.
«Mine, osy eki áýlıe Naýryz kúni aldynda jáne toı kúni balabaqshadaǵy búldirshinder men tómengi synyptaǵy syılyq úlestirse, batalaryn berip, ıgi-tilekterin bildirse, uly meıram - Naýryz merekesiniń tarıhy men erekshelikteri jaıly áńgimelep berse quba-qup emes pe? Bul aldaǵy ýaqytta dástúrge aınalsa bala júregine Qydyr babanyń kıesi, Umaı ananyń meıirim-shýaǵy daryp, ulttyq ulaǵat pen tálimge aınalmaı ma? Dástúrimiz ben saltymyz baldyrǵandarǵa áserli nasıhattalyp, Aıaz ataǵa júginip, Qarsha qyzǵa júgirgen balaýsalar túpki tamyryna osylaı oralmaı ma? Naýryzdy ulyqtap, tarıhty qadirleý úshin paıdalaný degenimizdiń biri osy», - deıdi depýtat Aldan Smaıyl.
