Naýryz meıramynda elordada 42 shara ótedi
ASTANA. 18 naýryz. QazAqparat - Kún men tún teńelip, tabıǵat shýaǵyn tógetin Naýryz meıramyn qarsy alýǵa búkil el daıyndalýda.
Shyǵys halqynyń jańa jyly sanalatyn osy basty merekege astanalyqtar da úlken ázirlik jasaýda. Halyqtyq serýen, kontsertter men dóńgelek ústel, spektaklder - barlyǵy 42 is-shara josparlanǵan. Negizinen qaladaǵy merekelik is-sharanyń kindigi «Qazaq eli» monýmenti aldyndaǵy alań bolyp tabylady, dep habarlady Astana qalasynyń resmı saıty.
22 naýryzda saǵat 10:00-den 17:00-ge deıin qala turǵyndary men qonaqtaryna teatrlandyrylǵan kórinister men Qazaqstannyń aımaqtarynan kelgen shyǵarmashylyq ujymdardyń merekelik kontserti usynylady. Olardyń árqaısysynyń ózderimen birge alyp kelgen shyǵarmashylyq nómirlerin qala turǵyndary 21 naýryz kúni 18.00-de Beıbitshilik pen kelisim saraıynda kóre alady.
Naýryz meıramyna arnalǵan merekelik kontsertke Qyzylorda oblysynyń «Dıdar» jáne «Dýdaraı» etno-folklorlyq ansambli, Pavlodar oblysynyń «Tomırıs» bı ansambli men «Mıras» vokaldy toby, «Ádemi» dýeti, Almaty oblysynyń «Aıjan qyz» halyq bıi ansambli, Soltústik Qazaqstan oblysynyń «Art-Dýman» toby, Aqmola oblysynyń «Kókshetaý», «On alty qyz» halyq bıi ansambli, «Aınakól» folklorlyq ansambli, «Suńqar» kvarteti, Almaty qalasynyń «Aısha Bıbi» folklorlyq ansambli, «Ladýshkı», «Qońyr», «Alash uly» toptary qatysady.
Sondaı-aq, kontsertte óner qaıratkerleri Ǵazıza Jumekenova, Álmyrza Noǵaıbaev, Ábdireıim Ómirov, Ramazan Stamǵazıev jáne basqalar óner kórsetedi.
Sport alańynda «Qazaqsha kúres», «Toǵyz qumalaq», «Buqa tartý», taǵy basqa ulttyq sport túrleri oınalady. Zergerlik buıymdardan, oıý-órnekten, bylǵary men kıiz buıymdarynan, t.b jasalǵan dekoratıvti-qoldanbaly ónerdiń kórme-jármeńkesi uıymdastyrylady. Bul kúni tańerteńgi 10:00-de qala ákimdiginiń aldyndaǵy Ortalyq alańda halyqtyq serýen, merekelik kontsert, dekoratıvti-qoldanbaly óner sheberleriniń kórmesi men merekelik saýda kórigi qyzbaq.
22 naýryz 19:00 saǵatta «Qazaqstan» ortalyq kontsert zalynda Álııa Ábikenovanyń «Án gákkýi» jeke kontserti ótedi.
22 naýryz kúni keshte 18:00-den 22:00-ge deıin Ortalyq alańda Astananyń shyǵarmashylyq ujymy men qazaqstandyq estrada juldyzdary Altynaı Jorabaeva, Aqylbek Jemeneı, Qaırat Nurtas, «Aldaspan» toby, Marjan Arapbaeva jáne basqalar qatysatyn jastar bı keshi uıymdastyrylady.
Naýryz meıramy merekesi 22.00 saǵatta otshashýmen aıaqtalady.
