Naýryz meıramy ulttyq salt-dástúrge qurmetpen qaraýǵa jeteleıdi - B.Tileýhan
ALMATY. 22 naýryz. QazAqparat /Erlik Erjanuly/ - QR Parlamenti Májilisiniń depýtaty Bekbolat Tileýhannyń aıtýynsha, Naýryz merekesin Ulystyń uly kúnine aınaldyrý ár adamnyń óz qolynda.
Úkimet Naýryzdy ulyqtaýda óz qolynan keletin is-sharany jasap jatyr. Bıyl úsh kúndi demalys dep jarııalap, sonyń nátıjesinde qazaqstandyqtar kún men túnniń teńelip, barsha tirshiliktiń oıandyrǵan Jańa jyldy 5 kún merekeleýge múmkindik alyp otyr.
«Ulystyń uly kúninde týǵan-týysty aralaıtyn bolǵan soń ol mindetti túrde merekelik kóńil-kúı syılaıdy. Ol óz ultyńnyń salt-dástúrine qurmetpen qaraýǵa jeteleıdi. Al qoǵamdyq sanany kóterý úshin árbir adamnyń belsendiligi kerek. Oǵan meniń ne qatysym bar degen teris oıdan arylý qajet», - deıdi Bekbolat Tileýhan. Óner sańlaǵynyń sózine qaraǵanda, ár azamat Naýryz kelgende naýryzdyq sıpattaǵy kıimderin kıip, otbasynda naýryz kójesin jasap, týys-týǵan men kórshi-qolańdy shaqyryp, bir-birine bereke-birlik tileıdi. Óz belsendiligimizdi kórsetsek, bizben ózge jurt ta sanasatyn bolady.
