Naýryz meıramy: Semeıde ájeler ulttyq taǵamdardyń qalaı ázirlenetinin úıretti
«Rýhanı jańǵyrý» baǵdarlamasy aıasynda ótken sharada mýzeı qyzmetkerleri bólmege jer ústel qoıyp, jan-jaǵyn quraq kórpemen ásemdedi. Bólmedegi oıý-órnektermen kórkemdelgen samaýryn men sandyq halqymyzdyń qonaqjaı ekendiginiń aıqyn dáleli ispettes.
Merekelik kezdesýdiń basty qonaqtary «Aısha bıbi» qazaq mádenı ortalyǵynyń músheleri boldy. Dóńgelek dastarhan basyna jaıǵasqan ulttyq kıim kıgen ájeler Naýryz kójeden dám tatty.
«Naýryz kóje - Ulystyń uly kúnindegi basty taǵam. Ol qasıetti 7 dámnen turady. Baýyrsaq pisirýdiń de qyr-syry bar. Tipti onyń dóńgelek pishinin saqtap pisýiniń de mańyzy zor. Buryn baýyrsaq qamyryna tek jumyrtqa ǵana qosylatyn. Nátıjesinde ol uzaq ýaqyt saqtalyp, búlinip ketpeıtin. Birde týystarymyzdyń birin áskerge shaqyrdy. Sol kezde jolda ash qalmasyn dep biz oǵan osyndaı baýyrsaq pisirip berdik», - dedi atalǵan ortalyq múshesi Kámshat Ábdilqyzy.
F.Dostoevskıı atyndaǵy mýzeıdiń buqaralyq jumys bóliminiń meńgerýshisi Saltanat Seksembaeva kezdesýdiń óte qyzyqty ótkenin aıtty. Óıtkeni, bul sharaǵa úı sharýasyndaǵy áıelder de qatysqan. Olar ózderiniń bilgenderin ortaǵa salyp, ulttyq taǵamdardy daıyndaý qazir áldeqaıda jeńil ekendigin jetkizdi. Sebebi barlyq taǵamnyń quramdaryn dúkenderden erkin satyp alýǵa bolady.
Ájeler merekelik dastarhan mázirin daıyndaýdyń barlyq ádis-tásilderin aıtyp bolǵan soń bata berip, barlyq qazaqstandyqtarǵa zor densaýlyq, molshylyq pen jaqsylyq tiledi.
