Naýryz meıramy kúnderi Qazaqstannyń basym aýmaǵynda kún aıazdy, jaýyn-shashyndy bolady dep boljanýda
ASTANA. 16 naýryz. QazAqparat /Jasulan Amanbaıuly/ - Naýryz meıramy kúnderi Qazaqstannyń basym aýmaǵynda kún aıazdy, jaýyn-shashyndy, kóktaıǵaq bolady.
Bul týraly búgin kóktem-jaz maýsymyndaǵy aýa raıynyń boljamdaryna arnalǵan brıfıng barysynda «Qazgıdromet» RMK Gıdromet ortalyǵynyń dırektory Baıan Sazanova málim etti.
B. Sazanovanyń aıtýynsha, qys qahary elimizdiń soltústik jáne shyǵys aımaqtarynan áli de kete qoımaıdy. Astanada kún bultty, jaýyn-shashynsyz, kúndiz 3-8 gradýs arasynda aıaz bolady dep boljansa, túngi mezgilde temperatýra 20 gradýsqa deıin tómendemek.
Soltústik Qazaqstan, Aqmola jáne Pavlodar oblystarynda 21-22 naýryz kúnderi aýa raıy bultty, jaýyn-shashynsyz bolady dep kútilýde. Kúndiz 0-5 gradýs, túnde 18-20 gradýs aıaz túsedi. 23 naýryzda aıaz sál basylyp, kúndiz 0-3 gradýs jyly, túnde 5-10 gradýs sýyqty kórsetedi.
Mereke kúnderi eldiń shyǵysynda kún bultty, jaýyn-shashynsyz bolady. Túnde 23-28 gradýs shyńyltyr aıaz, kúndiz 10 gradýs sýyqty kórsetedi. 23 naýryzda kúndiz 0-3 gradýs, túnde 5-10 gradýs sýyq bolady.
Naýryz meıramy kúnderi soltústik-batys aımaqtarda - Aqtóbe jáne Qostanaı óńirlerinde 0-5 gradýs aıaz, kún bulttanyp, qar jaýady. Túnde -10 gradýsqa deıin tómendeıdi.
Respýblıkanyń batysynda - Batys Qazaqstan, Atyraý, Mańǵystaý oblystarynda kún bultty, ara-tura jaýyn-shashyndy bolyp, tuman túsedi. Keı jerlerde kóktaıǵaq bolady. Kúndiz 4-9 gradýs aralyǵynda jyly bolsa, túngi ýaqyttarda -1-4 gradýsqa deıin aıaz turady. Mereke kúnderinen keıin kún 7-12 gradýsqa deıin jylynyp, aýa raıy jaýyn-shashynsyz bolmaq.
Ortalyq Qazaqstanda da túngi mezgilde 20 gradýs, kúndiz 0-5 gradýsqa deıin sýyq bolmaq. 23 naýryzda qar jaýýy yqtımal.
«Qazgıdromet» basshysynyń atap ótkenindeı, eldiń ońtústik-shyǵys aımaǵy (Jambyl, Almaty obl.) qazirden bastap jyly kóktemgi mezgilge boı aldyryp otyr. Ol jerlerde Naýryz meıramynda termometr 3-8, keı ýaqyttarda 13 gradýsqa deıin jylylyqty kórsetedi. Kún jaýyn-shashyndy, tuman túsýi múmkin.
«Ońtústik Qazaqstan, Qyzylorda oblystary kúndiz 13-15, túnde 5-8 gradýs jyly bolmaq. Kún bulttanyp, taýly aımaqtarda jaýyn jaýady dep boljanýda»,-dedi maman.
