Naýryz meıramy - qulpyrǵan kóktemdeı jastyqtyń, kún nuryndaı shýaqty meıirimniń, yrysqa bastar eldik yntymaqtyń, izgi dostyqtyń, adal mahabbattyń nyshany - QHA quttyqtaýy
Qurmetti otandastar!
Qazaqstan halqy Assambleıasy Sizderdi halqymyzdyń baı murasy men qazynaly dástúrin pash etetin aıtýly mereke, Ulystyń uly kúni Áz Naýryz merekesimen quttyqtaıdy!
Ata-babamyzdyń «jyldyń basy - Naýryz» dep ataýynda erekshe syr bar. Tabıǵattyń zańyna saı bul kúni tirshilik ataýlynyń bárine jan bitip, túlep, túrlenip, tóldep bastaıdy, kún men tún teńesip, jer beti jańasha ómirin jalǵastyrady. Qystan shyqqan el «berekeli Naýryz» keldi dep shattanyp, yntymaǵyn uıystyryp bas qosyp, dalany toltyryp ulan-asyr toıyn jasaıdy.
Bizdiń halqymyz úshin bul mereke - qulpyrǵan kóktemdeı jastyqtyń, kún nuryndaı shýaqty meıirimniń, yrysqa bastar eldik yntymaqtyń, izgi dostyqtyń, adal mahabattyń nyshany.
Ulystyń uly kúni eldiń basy bir arnaǵa toǵysyp, birligi bekemdelip, eldik murattar sabaqtalady.
Qazaqstan Respýblıkasynyń Prezıdenti - Elbasy N.Á. Nazarbaev: «Naýryz yqylym zamannan beri yrys pen yntymaqtyń, tatýlyq pen tazalyqtyń, birlik pen kisiliktiń meıramy bolyp esepteledi. Tabıǵat ıigen, kók tas jibigen Naýryzda meıirim shattyqqa ulasyp, baı men jarly teńeledi, barsha jurt yryzdyqqa keneledi. Ulystyń uly kúni aǵaıynnyń qushaǵy aıqara qabysyp, renishti jandar qaıta tabysady. Sondyqtan, túsinistikti tý etip, eldi birlik pen yntymaqqa, adamgershilik pen ımandylyqqa úndeıtin Naýryz merekesiniń tatýlyǵy jarasqan elimiz úshin mańyzy erekshe» - deıdi.
Táýelsizdik jyldary, berekeli bolashaǵymyz nesibeli bolsyn degen nıetpen, elimizdiń rýhanı qundylyqtaryna jete mán berilip, ata dástúrimizdi jańǵyrtýǵa keń jol ashyldy. Sonyń ishinde Ulystyń uly kúni Áz Naýryzdyń orny erekshe. Osy jyldary ejelden kele jatqan Naýryz merekesiniń negizgi qaǵıdattarynyń - beıbitshilik pen qoǵamdyq kelisim jolyndaǵy, turaqty da gúldengen qoǵam ornatyp el yrysyn eseleı túsýge zor yqpal etkenin atap ótýge tıispiz.
Naýryz merekesi búginde, barsha Qazaqstan halqyna ortaq, árbir otbasynyń asyǵa kútetin merekesi. Mamyrajaı qoǵamy bar, beıbitshilik pen kelisim murattaryna adal barsha otandastarymyz Naýryzdyń saltyna saı bul kúnderi birin-biri dastarhanǵa shaqyryp, boıyna qýat tilep, naýryz kóje tartyp, aq tilek pen batalaryn jaýdyrady.
Qadirli otandastar!
El ıgi armanyn ardaqtap, jetistikterin áıgileıtin merekede halqymyzdyń yntymaǵy jarasyp, elimiz molshylyqqa, al ár shańyraq - baqyt pen shattyqqa tolsyn dep tileımiz!
Barshańyzǵa shyn júrekten, shynaıy kóńilmen baq-bereke tileımiz. Elimiz aman, jurtymyz tynysh bolsyn!
Qazaqstan halqy Assambleıasynyń Keńesi
