Naýryz meıramy qarsańynda qoǵamdyq tártipti qamtamasyz etý kúsheıtildi - ІІD
ASTANA. 15 naýryz. QazAqparat - Naýryz meıramyn merekeleý qarsańynda qoǵamdyq tártipti qamtamasyz etý kúsheıtildi.
Astana qalalyq Іshki ister departamentinde bolǵan búgingi baspasóz máslıhatynda málim bolǵandaı, tártip saqshylary «Quqyqtyq tártip» jedel aldyn alý sharasyn ótkizip jatyr. Quqyq buzýshylyqty boldyrmaý men qaladaǵy tártipti nyǵaıtý maqsatynda júzege asyrylyp jatqan shara 14-18 naýryz aralyǵyn qamtymaq.
Sonymen qatar iz-tússiz joǵalǵan azamattardy izdestirý, aýyr jáne asa aýyr qylmys jasaǵan qylmyskerlerdi ustaý, ekonomıkalyq jáne sybaılas jemqorlyq qylmystaryn jasaǵan tulǵalardyń zańsyz áreketterin áshkereleý men keden zańnamasyn buzý faktilerin anyqtaý boıynsha TMD elderi quqyq qorǵaý organdarymen birlesken «Іzdestirý» sharasy da júrgizilip jatyr.
ІІD málimetterine sáıkes, alǵashqy kúnniń qorytyndylary boıynsha ІІO-da esepte turǵan 542 azamat tekserilip, 1153 ákimshilik quqyq buzýshylyq anyqtalǵan, qańǵybastyqqa salynǵan 51 adam ustalǵan. QR shekarasynda zańsyz júrgen 4 shet el azamaty syrtqa shyǵarylǵan.
