Naýryz meıramy qarsańynda 17 myńnan astam adam Qazaqstan azamattyǵyn alatyn boldy

Bul týraly búgin Aqordada QR Memlekettik hatshysy-Syrtqy ister mınıstri Qanat Saýdabaevtyń tóraǵalyǵymen ótken QR Prezıdenti janyndaǵy Azamattyq máseleler jónindegi komıssııanyń kezekti otyrysynda málim boldy, dep habarlaıdy QazAqparat.

Komıssııa otyrysy barysynda Qazaqstan azamattyǵyn alǵysy keletin adamdardyń qujattary talqylandy. Osyǵan baılanysty tıisti Jarlyqqa Memleket basshysy qol qoıǵannan keıin 17 myńnan astam adam Qazaqstan Respýblıkasynyń jańa azamattyǵyn qabyldaıdy. Azamattyqqa ótinish bildirgenderdiń arasynda qazaqtar jáne TMD elderi men alys shetelderden kelgen birqatar basqa ult ókilderi bar. «Álemdik qarjylyq, ekonomıkalyq daǵdarystyń saldaryna baılanysty týyndaǵan qıyn ýaqytta Qazaqstan azamattyǵyn alýǵa ártúrli elderden ótinish berýshi adamdardyń sany ósip keledi. Bul jalpy ulttyq Kóshbasshy jáne Qazaqstannyń tuńǵysh Prezıdenti N. Nazarbaevtyń syndarly strategııasynyń, osy adamdardyń dál osy elde ózderine jáne balalaryna laıyqty ómir súrýine degen senimderiniń ornyǵýynyń dáleldi kýási. Qazaqstan Respýblıkasynyń azamaty degen joǵary ataq barlyq tıisti quqyqtardy berip qana qoımaı, sonymen birge bizdiń zańdarymyzdy saqtaýǵa, salt-dástúrlerimizdi, mádenıetimizdi qurmetteýge, elimizde beıbitshilik pen kelisimdi qoldaýǵa, respýblıkanyń ári qaraı áleýmettik-ekonomıkalyq jáne qoǵamdyq saıası damýyna óz úlesin qosýdy da mindetteıdi», dep atap ótti jıyn barysynda Q. Saýdabaev.