Naýryz meıramy Fınlıandııada turatyn Ortalyq Azııa halyqtarynyń basyn biriktirdi
Іs-shara «Juldyz» Ortalyq Azııa elderi assotsıatsııasy men «Sáýle» mádenıet ortalyǵynyń bastamasymen jáne Qazaqstannyń Fınlıandııadaǵy Elshiliginiń qoldaýymen Fınlıandııa jurtshylyǵyn Ortalyq Azııa halyqtarynyń mádenı murasymen tanystyrý maqsatynda uıymdastyryldy.
«Juldyz» jáne «Sáýle» birlestikteriniń belsendileri, Qazaqstannyń Fınlıandııadaǵy Elshisi Murat Nurtileýov jınalǵan qaýymdy Ortalyq Azııanyń baýyrlas halyqtary úshin jańa ómirdi, jańarýdy jáne birigýdi bildiretin «Kóktemgi kún men túnniń teńelýi kúnimen» quttyqtap, izgi tilekterin jetkizdi.
Óńir memleketteri basshylarynyń bıylǵy 15 naýryzda Astanadaǵy tarıhı kezdesýiniń nátıjelerine erekshe nazar aýdaryldy. «Juldyz» assotsıatsııasynyń basshysy Mávlúdá Peıponen:
«Sýomıdegi qazaqtar, ózbekter, qyrǵyzdar, tájikter jáne túrikmender oqıǵanyń tynysyn tereń uǵyndy. Bul shyndyǵynda elderimiz arasyndaǵy qazirgi qarym-qatynastar tarıhynda jańa beles bolyp tabylady.
Osy oraıda, men úshin keleshek gúldenýi bir-birinsiz múmkin emes óńirimiz árqashan birtutas saıası, ekonomıkalyq jáne mádenı alań ekenin atap ótkim keledi. Sondyqtan, biz barlyq baýyrlas halyqtardy biriktiretin jáne Oralyq Azııa elderiniń Fınlıandııamen ózara tıimdi baılanystaryn keńeıtýge múmkindik beretin assotsıatsııa qurý týraly bastama kóterdik.
Sonymen qatar, men basqaratyn qoǵamdyq uıymnyń mindeti - negizgi quramy daýsyz Ortalyq Azııa murasy bolyp tabylatyn jahandyq rýhanı jáne mádenı baǵdarlardy qalyptastyrý», - degen pikirlerimen bólisti.
«Sáýle» qoǵamdastyǵynyń belsendi músheleriniń biri Gaýhar Álimhanova: «Biz Astanadaǵy jáne kórshiles elderdegi jańalyqtardy muqııat qarap otyramyz. Ortalyq Azııadan shyqqan Fınlıandııa turǵyndarynyń kópshiligi de tatý kórshilik pen tyǵyz kooperatsııa jalpy jetistiktiń kepili retinde qabyldanatyn jetpis mıllıon halqy bar óńirdiń ajyramas bóligi retinde sezinedi.
Qazaqstan astanasyndaǵy bıik deńgeıdegi kezdesý bizder úshin 2018 jyldyń basyndaǵy eń iri jáne qýanyshty saıası oqıǵa boldy. Biz Astanada kóshbasshylarymyz ben memleketterimizdiń birligin kórdik, qarym-qatynastardy nyǵaıtý úshin jańa serpinniń paıda bolǵanyn, baýyrlas halyqtar arasyndaǵy dástúrli dostyq baılanystaryn tereńdetýge degen saıası erik pen nyq umtylysty baıqadyq.
Bul kezdesýdiń óńirlik yntymaqtastyqta jańa beles ashatynyna senimdimin, bizder ortaq dáýlet pen turaqtylyqqa aparar úlken joldyń basynda turmyz. Biz Fınlıandııadaǵy eń iri Ortalyq Azııa dıasporasy retinde Prezıdentimizdiń jasampaz oılaryn qoldap, ilgeriletýge nıettimiz», - dep atap ótti.
Іs-shara qonaqtaryna óńir halyqtary mádenı murasynyń, salt-dástúrleriniń bar baılyǵyn kórsetken Ońtústik Qazaqstan shyǵarmashylyq tobynyń daryndy oryndaýshylary men Ortalyq Azııa dıasporasynyń kontserttik baǵdarlamasy kórermenderdiń erekshe qoshemetine bólendi.
Qazaqstan dıplomattary is-shara barysynda qonaqtarǵa elimizdiń ultaralyq jáne konfessııaaralyq kelisim salasyndaǵy jetistikteri men bastamalary, sondaı-aq elimizde «100 qadam» ult jospary, «Nurly jol» jańa ekonomıkalyq saıasaty jáne «Úshinshi jańǵyrý: jahandyq básekege qabilettilik», «Rýhanı jańǵyrý» baǵdarlamalary aıasyndaǵy saıası, ekonomıkalyq jáne áleýmettik turmystaǵy úsh birlikti jańǵyrýdy ilgeriletý barysy jaıly aıtyp berdi.
