Naýryz merekesine oraı elordany ásemdeý sharalaryna aıryqsha kóńil bólinip otyr
ASTANA. 19 naýryz. QazAqparat - Bıylǵy jyly aıryqsha uıymdastyrylyp otyrǵan Naýryz meıramynda astanalyqtar jaryq shashý shoýyn, kontserttik baǵdarlamany kórip, túrli ulttyq dastarqandardan dám tatyp qana qoımaıdy, qalanyń estetıkalyq kelbeti de olardyń kóńilin kóteretin bolady, dep habarlaıdy elordanyń resmı saıty.
Bul úshin qala kósheleri túrli jalaýlarmen, jaryq shashatyn jabdyqtarmen, gúl pannolarymen ásemdelip, aǵashtar da bezendirildi. Qala boıynsha ulttyq boıaýdaǵy sáýlet óneriniń ozyq úlgileri nasıhattalýda. Qazaq halqynyń turmys-tirshiligin beıneleıtin pishinder men kompozıtsııalar elordalyq dızaınerlerdiń qııalyn baıytýda. Olar bul jumystaryn aldyn ala osy jyldyń qańtar aıynda bastaǵan bolatyn. Shaǵyn sáýlet pishinderin daıyndaýǵa temir, gıps, akrıl, fıbrobeton, áınek tini jáne mata paıdalanyldy. 2,5 aı ishinde ázirlengen jobalar Astana qalasy ákimdiginde qatań irikteýden ótti. Naýryz meıramy qarsańynda elorda kóshelerinde osy merekelik kompozıtsııalar boı kórsetti.
Sonymen qatar, qala boıynsha 7 alań jalaýmen jasandyryldy. Shahar magıstraldaryn bezendirýde 53 jaryq arkasy paıdalanyldy. Úsh «Aýyl» kompozıtsııasy ornatylyp, 7 kópir túrli otshashýlarmen ásemdeldi. «Sýly-jasyl gúlzar», «Otan qorǵaýshylar» alańy, Aq orda men Qarjy mınıstrligi aldyndaǵy alańdar da kózdiń jaýyn alarlyqtaı ádemilendi»,-delingen bul málimetterde.
