Naýryz merekesi qarsańynda Aqmola oblysynyń birqatar aýdanynda páter kiltteri tapsyryldy
Aldymen Tselınograd aýdanynyń Aqmol aýylynda kópbalaly jáne turmysy tómen otbasylar men jetim balalar baspanaly boldy. Mundaǵy 45 páterli turǵyn úıdiń qurylysy «Nur-Sultan qalasynyń shetki aımaqtaryn damytý» baǵdarlamasy aıasynda salynǵan. Qurylystyń jalpy aýdany 755 sharshy metrdi quraıdy. Ony merdiger kompanııa «Astana kóktem S» jaýapkershiligi shekteýli seriktestigi júrgizgen.
Aıtalyq, bıylǵy jyly «Nurly jer» memlekettik baǵdarlamasy arqyly Qosshy jáne Aqmol aýylynda halyqtyń áleýmettik jaǵynan osal toptaryn baspanamen qamtý úshin 2 turǵyn úı salyndy.
Sonymen birge, Esil qalasynda da kópbalaly jáne tolyq emes otbasylar, jetim balalar men múgedektigi bar adamdar, sondaı-aq, páter kezeginde turǵan 45 turǵyn úıden páter kiltterin aldy.
Sanıtarlyq talaptardy saqtaı otyryp ótken sharada aýdan ákiminiń mindetin atqarýshy Nurlan Samatov qonys ıelerin qýanyshtarymen quttyqtady. Baspanaly bolǵandardyń biri –kópbalaly ana Gúlmıra Ǵabdýlınova. Ol osy sátti asyǵa kútip, endi qonys toıyn toılaýǵa daıyndalýda.
«Qýanyshymyzda shek joq. Jıhaz ben turmystyq tehnıkany ákelý qaldy. Keń dáliz, úlken jaryq bólmeler. Bul jerde maǵan da, kúıeýime de, barlyq tórt balaǵa da oryn jetedi», – dep qýanyshymen bólisti baspana ıesi Gúlmıra Ǵabdýlınova.
Búginge tańda aýdan boıynsha 521 adam páter kezeginde tur.
Osy kúni Birjan sal aýdanynyń ákimi Dostanbek Esjanov Stepnıak qalasynda «Nurly jer» baǵdarlamasy boıynsha jańadan salynǵan 21 páterli turǵyn úıden jańa páterdiń kiltin tapsyryp, qýanysh ıelerin quttyqtady.
Páterli bolǵandardyń arasynda kópbalaly otbasylar jáne halyqtyń áleýmettik jaǵynan osal toptary bar. Qurylys jumystaryn «Eńbek-Astana» kompanııasy júrgizdi. Mundaǵy 21 páterdiń 3-ýi bir bólmeli, 9-y eki bólmeli jáne 9-y úsh bólmeli. Aýdan turǵyndaryn turǵyn úımen qamtamasyz etý maqsatynda taǵy bir 21 páterli úıdiń qurylys jumystary júrgizilýde. Budan bólek, eki 21, eki 45 jáne bir 30 páterli turǵyn úı salý josparlanǵan.
