Naýryz merekesi barshamyzǵa qut-bereke ákelsin - Nurbergen Jumaǵazıev
ORAL. QazAqparat - Naýryz merekesi barshamyzǵa qut-bereke ákelsin. Otanymyzǵa - bereke, halqymyzǵa - ıgilik, memleketimizge - molshylyq, al ár shańyraqqa baqyt pen shattyq tileımin. Elimiz órken jaıyp, Naýryz bárimizge yntymaq pen sáttilik ala kelsin. Bul týraly short-trekten Qazaqstan ulttyq quramasynyń múshesi Nurbergen Jumaǵazıev málim etti, dep habarlaıdy «QazAqparat» HAA tilshisi.
1990 jyly 29 qarashada Terekti aýdany Shaǵataı aýylynda ómir esigin ashqan Nurbergen keıin Oral qalasyndaǵy №25 jáne №44 mektepterde bilim aldy. Sportqa daryndy balalarǵa arnalǵan mamandandyrylǵan oblystyq mektep-ınternatty bitirgen ol short-trekpen 11-12 jasynan aınalysyp keledi. Dál sol kez Oralda jabyq muz aıdyny saraıy ashylyp, short-trekten Qazaqstannyń eńbek sińirgen jattyqtyrýshysy Mádiǵalı Qarsybekovtiń talapty balalardy iriktep ala bastaǵan tusy edi. On bes jylǵy eńbek óz nátıjesin berip, qazaqstandyq shorttrekshiler úshin ótken maýsym sátti boldy deýge negiz bar. 2016 jyly aldymen Abzal Ájiǵalıev álem kýbogy kezeńinde qazaqstandyq shorttrekshiler arasynan alǵashqy bolyp 500 metr qashyqtyqta top jarsa, sodan keıin Nurbergen Jumaǵazıev 1000 metrden birinshi keldi. Bıyl Denıs Nıkısha Mınskide ótken álem kýbogy kezeńinde 500 metr qashyqtyqta jeńimpaz atansa, Abzal Ájiǵalıev máre syzyǵyn ekinshi bolyp qıǵan edi. Nurbergen sol óziniń oń jambasyna keletin 1000 metrden qola júldeni ıelendi. Oǵan qosa Qazaqstan quramasy 5 myń metrlik estafetalyq jarysta úshinshi oryndy enshiledi. Sondaı-aq qazaqstandyq short-trekshilerdiń Almaty qalasynda ótken HHVІІІ qysqy ýnıversıadada júldegerler qatarynan kóringeni belgili. Qysqasha aıtqanda, álemdik short-trek sheberleri qazaqstandyqtarmen sanasa bastady.
«Oralǵa Naýryz merekesi qarsańynda kelip, otbasymyzben qaýyshyp, úlken qýanysh ústindemiz. Ákem Batyrǵalı «Kaztrýbprom» kásipornynda tokar bolyp eńbek etse, anam Zınegúl úıde otyrady, zaıybym Shynaraıǵa qyzym Nuraıdy baǵýǵa kómektesedi. Eki apam, bir qaryndasym bar. Qaryndasym Ǵalııa da short-trekpen dendep aınalysady, Astanadaǵy sport-ınternatta oqıdy. Oralǵa kelgen soń, Ulystyń uly kúnine oraı ulttyq sport túrlerinen uıymdastyrylǵan jarysqa qurmetti qonaq retinde qatysyp, ózimiz de asyq atyp, máz bolyp qaldyq. Men búgin Almatyǵa ushamyn, Abzal Ájiǵalıev pen Aıdar Bekjanov sál keıinirek keledi. Denıs Nıkısha da qosylady. Almatyda jaraqatymdy emdegennen keıin Astana, sodan sáýir aıynda Ispanııaǵa baryp, gollandyqtarmen birge 2018 jylǵy olımpıadaǵa irikteý jarystaryna daıyndyqty bastaımyz. Bıyl kúzde bastalatyn álem kýbogynyń tórt kezeńinde baq synaımyz, sonyń úsheýindegi jaqsy kórsetkishimiz esepteledi. Ońtústik Koreıanyń Phenchhan qalasynda ótetin olımpıada oıyndaryna beriletin joldamany jeńip alyp, el namysyn abyroımen qorǵasaq deımiz. Eń basty maqsatymyz da sol», dedi «QazAqparat» tilshisine Nurbergen Jumaǵazıev. 
