Naýryz merekesi Astanada keńinen atap ótilýde
ASTANA. 19 naýryz. QazAqparat - «Bıylǵy jyly Naýryz meıramy Astana qalasynda keńinen atap ótilýde», -dep habarlaıdy Astana ákimdiginiń baspasóz qyzmeti.
Barlyq balabaqshalar men mektepterde Naýryz meıramyna oraı merekelik is-sharalar ótkizilýde. Qalada «Armysyń, áz Naýryz!» atty qalalyq baıqaý jarııalanyp, 92 mekeme baıqaýǵa qatysýǵa ótinish bildirdi. Baıqaý 15 naýryzda bastalyp, 27 naýryzda óz máresine jetedi. Sondaı-aq, Naýryz meıramyna oraı Tilderdi damytý basqarmasy «Armysyń, áz Naýryz!» atty merekelik baǵdarlama ázirledi. Merekelik is-sharanyń basty maqsaty - qala jurtshylyǵyna Naýryz meıramy - tarıh qoınaýynan kelgen, ata babamyzdan mıras bolyp qalǵan meıram ekenin kórsetý, tereń fılosofııalyq maǵynasyn ashý, qazaq halqynyń salt-dástúrleri men ádet-ǵuryptaryn nasıhattaý, kóktemniń, eńbektiń jáne birliktiń meıramy - jalpyulttyq meıram ekenin kórsetý bolyp tabylady.
Kontserttik baǵdarlama - sahna tórine Qyzyr babanyń kelýimen bastalyp, kórisý dástúri maǵynasynyń ashylýymen jalǵasady. Jer jylyp, kún áýelep, tóńirek keńip, Kún men tún teńesken kúni ata-babalarymyz qalyptasqan saltpen kórisetin bolǵan. «Kórisý» Naýryzdyń baıyrǵy dástúri. Kórisýden keıin halyqty quttyqtap, aqyn arnaý aıtady. Odan keıin ár etnostyń 10-12 balasy Saýmalyq dástúrin kórsetedi. Dástúrdiń aıaǵyna qaraı balalar Qyzyr babamen kezdesip, Qazaqstan, Astana, Naýryz meıramy týraly áńgime qurady.
Merekelik is-shara aıasynda kishkentaı balalardyń tusaýy kesilip, Qyzyr ata bata beredi. Teatrlandyrylǵan kórinisterge Q. Qýanyshbaev atyndaǵy Qazaq akademııalyq drama teatrynyń ártisteri qatysady.
Merekelik kontsertte belgili ártister Gúlzıra Bókeıhan, Aıgúl Elshibaeva, Serik Ospanov, Nuraı Tanabaev, Tatıana Hasııanova, «Samuryq» toby óz ónerlerin kórsetedi. Sondaı-aq, Qaragóz Gasımova, Lázzat Kóbenova, Elnur Qadyrbek syndy ártister óz ónerlerin ortaǵa salady. Jastar arasynda aıtys ótkizilip, kúı oryndalady.
Naýryz meıramy - Qazaqstanda turatyn barlyq etnostarǵa qymbat jáne ortaq meıram. Naýryz meıramy bul halyqtyq mereke, dostyq pen týystyqty nyǵaıtýda mańyzy zor. Qaladaǵy etnomádenı ortalyqtardyń ókilderi is-sharaǵa belsene atsalysýda. Ár etnostardyń ókilderi óz ónerlerin kórsetedi. Mysaly, ázirbaıjan, ózbek, uıǵyrlardyń ulttyq bıleri, qyrǵyz, polıak ánderi oryndalady.
Merekelik keshke Qazaqstan Respýblıkasy Parlamenti depýtattary, zııaly qaýym ókilderi, qala turǵyndary shaqyrylyp otyr. Keshke qarttar men múgedekter, sondaı-aq balalar úıleriniń ókilderi qatysyp, olarǵa arnaıy syılyqtar beriledi.
