Naýryz qarsańynda mańǵystaýlyq oqýshylar saýapty is jasady
AQTAÝ. QazAqparat - Munaıly aýdanynyń oqýshylary Naýryz qarsańynda mektep aýlasyn erekshe ádispen kóǵaldandyrdy, dep habarlaıdy QazAqparat.
Mańǵystaýlyq oqýshylar jańa bastamany beınetaspaǵa túsirip, áleýmettik jelide jarııalaǵan. Olar óńirdegi barlyq mektep oqýshylaryn jasyldaný jumystaryna belsendi qatysyp, jaqsy is jasaýǵa úndeýde.
№12 mekteptiń 11 synyp oqýshylary jańa bastamany qolǵa alǵan. Bilim oshaǵyn ózderiniń ıdeıalary boıynsha bezendirip, túrli taldar otyrǵyzǵan.
1 apta buryn bastalǵan saýapty is «Meniń jasyl mektebim» saıysy aıasynda ótýde eken.
«Bul mektep oqýshylarynyń, muǵalimderdiń ıdeıasy. Onda ár túrli saıysqa qatysyp, jeńimpaz atanǵandardy marapattap, kelesi aptada ótetin sharalardy josparlaımyz. Osy bastamany aıtqanymda, bári biraýyzdan qoldaı ketti. Qazir áleýmettik jelige de tarap ketken. Negizi áýel basta jarys etip uıymdastyrǵanbyz», - deıdi mektep dırektory Qaırat Tıtanov.
Saıys kelesi aıda aıaqtalady. Úzdik oqýshylar arnaıy marapattalady.
Aıta keteıik, mektep oblystaǵy óte erekshe bezendirilgen bilim oshaǵynyń biri. Munda synyptarǵa deıin bólme gúlderi qoıylǵan.
