«Naýryz Challenge»: Aqtóbelik kásipker múgedek otbasynyń páterin jóndeýde
AQTÓBE. QazAqparat - Aqtóbelik kásipker «Naýryz Challenge» aktsııasy aıasynda І top múgedegi Symbat Naǵmetovanyń úıin jóndeıdi, dep habarlaıdy QazAqparat tilshisi.
Aqtóbedegi múgedekter úshin arnaıy salynǵan úıdiń turǵyny Symbat Naǵmetov erekshe qýanyshqa keneldi. «Naýryz Challenge» aktsııasy aıasynda «Qamqorshylyq-Zabota» qaıyrymdylyq qorynyń dırektory, oblystyq máslıhattaǵy «Nur Otan» partııasy fraktsııasynyń múshesi Dmıtrıı Dovmatenko 1 mıllıon teńgege jýyq qarjy bóldi.
«Bul úıdi 2011 jyly aldym. Qazir otbasym bar, bir balamyzdy baǵyp júrmiz. Shynyn aıtqanda ózim arbaǵa tańylǵan soń balamnyń kútimin kóbine kúıeýim jasaıdy. Balam da erekshe kútimdi qajet etedi. Sondyqtan úıge kóńil bólip, ony jóndeý biz úshin qıynǵa soqty. Jańa jyl kelip, Naýryz merekesi qarsańynda páterimizge ár berip, qamqorlyq tanytqan jandar kezdesti. Biz úshin bul kómek ári jaqsy syı», - dedi Symbat Naǵmetova. Ózi Aqtóbe qalalyq sal aýrýyna shaldyqqan azamattardy qoldaý ortalyǵynda jumys isteıdi. Tabysy páter jóndeýge jetpegen soń kómek surap, Aqtóbe qalalyq sal aýrýyna shaldyqqan azamattardy qoldaý ortalyǵynyń basshylyǵynan kómek surady. Al ortalyq kásipkerge usynys tastady. Qazirgi kúni 1 bólmeli páter qalpyna keltirilip jatyr. Páterdiń esigi, edeni aýystyrylyp, tusqaǵaz japsyrylady. Sonymen qatar as bólme, jýynatyn bólme túgel jańartylady.
