Naýryz aıynyń sońǵy kúnderi jaýyn-shashyndy bolady - Qazgıdromet
ASTANA. QazAqparat - «Qazgıdromet» RMK 29-31 naýryz kúnderine arnalǵan aýa raıy boljamyn usynady.
"Kaspıı teńiziniń ústinde qalyptasqan, tsıklon, Qazaqstannyń batys, ortalyq jáne soltústik oblystary arqyly Batys Sibirge qaraı jyljıdy. Osy tsıklonnyń saldarynan jer-jerlerde jaýyn-shashyn, kóktaıǵaq, tuman, ekpindi jeldiń jyldamdyǵy 15-20 m/s bolady, al 31 naýryzda respýblıkanyń batysy men soltústiginde batys jeldiń qarqyny 18-23 m/s, keı jerlerde 28 m/s kúsheıedi. Osy tsıklonmen baılanysty, atmosferalyq fronttarmen Qazaqstannyń ońtústiginde 29-31 naýryzda, ońtústik-shyǵys pen shyǵysta 31 naýryzda kún bultty, jańbyrly bolyp, shyǵysta qarǵa kóshýi múmkin. Biraq troposferadaǵy aýa massasynyń Iran aýdandarynan, ońtústik-batystan kóshýi jalǵasa beredi de, respýblıkada temperatýra ortasha kópjyldyqtaǵyǵa jýyq, al ońtústik pen shyǵysta ol 5-10º joǵary bolady», - delingen habarlamada.
